ކުރިއަށް އޮތް 25 އަހަރަށް އަމާޒުކޮށްގެން މަސްވެރިކަމާ ގުޅޭ މާސްޓަޕްލޭނެއް އެކުލަވާލަން ނިންމައިފި އެވެ.މަސައްކަތް ފަށައިފި އެވެ.
ފިޝަރީޒް މިނިސްޓްރީން ބުނީ ރާއްޖޭގެ އިގުތިސާދުގެ ދެވަނަ ސިނާއަތުގެ ގޮތުގައި މަސްވެރިކަމުގެ ދާއިރާ ކުރިއަރުވައި ތަރައްގީކޮށް ސިންދަފާތުކޮށް ކުރިއެރުވުމަށް ކުރަން ރާވާފައިވާ ކަންކަމަކީ އިސްތިރާޖީ ޕްލޭނެއްގެ ދަށުން ކުރިއަށް ގެންދާ ކަންތައްތަކަށް ހެދުމަށްޓަކައި 25 އަހަރުގެ މާސްޓަޕްލޭނެއް އެކުލަވާލުމަށް ނިންމީ ކަމަށެވެ.
އެ ޕްލޭނުގައި ކުރިއަށް އޮތް 25 އަހަރު ދުވަހު މަސްވެރި ސިނާއަތުން ހާސިލު ކުރަން ބޭނުންވާ ކަންކަމާއި ތަސައްވުރާއި އަމާޒު ކަނޑައަޅާނެ އެވެ. އަދި ކަނޑުތަކުގެ ވަސީލަތް ފުރިހަމައަށް ބޭނުންކޮށް އިގުތިސާދީ ނަފާ އިތުރުކުރުމަށް ލަނޑުދަނޑިތަކެއް ރޭވި އެކަން ހާސިލުކުރުމަށް ކުރާނެ ކަންކަން ވެސް ޕްލޭންގައި ހިމަނާނެ އެވެ.
ފިޝަރީޒް މިނިސްޓްރީން ބުނީ މާސްޓަޕްލޭން އެކުލަވާލުމަށް ބޭނުންވާ ފައިސާ ވޯލްޑް ބޭންކުގެ އެހީގައި ހަމަޖެހިފައިވާ ކަމަށެވެ.