ހޮލީވުޑްގެ ދުވަސްވީ ތަޖުރިބާކާރު އެކްޓަރު ރޮބަޓް ޑި ނީރޯ މުހިއްމު ރޯލެއް ކުޅެފައިވާ ވެބް ސީރީޒް "ޒީރޯ ޑޭ" ޕްރީމިއާކުރާ ތާރީހު އިއުލާންކޮށްފި އެވެ.
މީގެ ދެ އަހަރު ކުރިން މަސައްކަތް ފެށި ހަ އެޕިސޯޑްގެ މި ސީރީޒް ނެޓްފްލިކްސް އޮން ޕްރީމިއާ ކުރަން ހަމަޖެހިފައި ވަނީ އަންނަ އަހަރުގެ ފެބްރުއަރީ 20 ގަ އެވެ. ސައިބައެޓޭކްގެ ހާދިސާތަކަށް ބިނާކޮށް ހަދާފައިވާ މި ކޮންސްޕިރަސީ ޕޮލިޓިކަލް ތުރިލާގައި ޑި ނީރޯ، 81، ކުޅެފައި ވަނީ ޖޯޖް މުލެން ކިޔާ ކެރެކްޓާއެކެވެ.
އެރިކް ނިއުމަންގެ މޭސްތިރިކަމުގެ ދަށުން ލެސްލީ ލިންކާ ގްލެޓާ ޑައިރެކްޓްކޮށްފައިވާ "ޒީރޯ ޑޭ" ގެ ކާސްޓްގައި ލިޒީ ކެޕްލަން، ޖެސީ ޕްލެމަންސް، ޖޮއާން އެލެން، ކޮނީ ބްރިޓަން، ބިލް ކޭމްޕް، ޑޭން ސްޓީވެންސް، އެންޖެލާ ބެސޭ، މެތިއު މޯޑީން އަދި މެކިންލީ ބެލްޗާ ތިނެއް ހިމެނެ އެވެ.
"ގޯޑްފާދާ" ފަދަ ކާމިޔާބު އެތައް ފިލްމެއް މިހާތަނަށް ކުޅެ، އެތައް އެވޯޑެއް ވެސް ހޯދާފައިވާ ޑި ނީރޯގެ އެންމެ ފަހުގެ ފިލްމަކީ މިދިޔަ އަހަރުގެ ކޮމެޑީ ޑްރާމާ "އެޒްރާ" އެވެ. އޭނަގެ ކުރިއަށް ހުރި ފިލްމުތަކަކީ "އަލްޓޯ ނައިޓްސް" އާއި "ޓިން ސޯލްޖާ" އެވެ.