ރައްޔިތުންގެ މަޖިލީހުގެ މެންބަރުންނަކީ 'ބޮޓުން' ކަމަށް ދޭހަވާގޮތަށް މަޖިލީހުގެ ތަޅުމުގައި މެންބަރުން ވާހަަކަ ނުދެއްކެވުމަށް މަޖިލީހުގެ ރައީސް އަބްދުއްރަހީމް އަބްދުﷲ އެދިވަޑައިގެންފި އެވެ.
މަޖިލިސް ރައީސް އަބްދުއްރަހީމް މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައ،ި އިސްރާއީލްގެ ޕާސްޕޯޓް މަނާކުރުމަށް ހުށަހަޅާފައިވާ ބިލު އަވަހަށް ފާސްކުރުމަށް ގޮވާލައި ހުށަހަޅާ ޤަރާރުގެ ބަހުސް ކުރިއަށްގެންދިޔައިރު، މެންބަރު މީކާއިލް އަހުމަދު ނަސީމް ދެއްކެވި ވާހަކަތަކަކާ ގުޅިގެންނެވެ.
އެގޮތުން މެންބަރު މީކާއިލް ވިދާޅުވީ މަޖިލީހުގެ އެޖެންޑާއަކީ ރައީސް އޮފީހުން ދޭ އެއްޗަކަށް ހެދުން ހުއްޓާލަން ޖެހޭ ކަމަށެވެ. އަދި މަޖިލީހުގެ މެންބަރުން ކޮންޓްރޯލް ކުރާކުރުން ހުއްޓާލަންޖެހޭ ކަމަށެވެ.
މީކާއިލް މިފަދައިން ވިދާޅުވުމުން މަޖިލިސް ރައީސް އަބްދުއްރަހީމް ވިދާޅުވީ، މަޖިލީހުގެ މެންބަރުންނަކީ ބޮޓުން ކަމަށް ދޭހަވާ އިބާރާތުން ވާހަކަ ދެއްކުމަކީ، މެންބަރުންގެ ގަދަރާއި އިއްޒަތަށް އުނިކަން އަންނާނެ ކަމެއް ކަމަށެވެ. އެހެންކަމުން މަޖިލިސް ރައީސް އަބްދުއްރަހީމް ވަނީ އެގޮތަށް ވާހަކަ ނުދެއްކުމަށް މެންބަރު މީކާއިލްގެ ކިބައިން އެދިވަޑައިގަނެފަ އެވެ.
ރައްޔިތުންގެ މަޖިލީހުގެ ބައެއް މަސައްކަތްތައް ނިންމުމުގައި ލަސްވެ އަދި އަނެއްބައި މަސައްކަތްތައް ކުރު މުއްދަތެއްގެ ތެރޭގައި ނިންމާތީ ސަރުކާރުގެ ނުފޫޒު މަޖިލީހަށް އޮންނަކަމަށް އިދިކޮޅު ފަރާތްތަކުން ތުހުމަތު ކުރެއެވެ.