ތާލިބާނުންގެ ބާރުގެ ދަށުގައި މިހާރު އޮތް އަފްގާނިސްތާންގެ އަންހެން ކުދިންނާއި އަންހެނުންގެ ހައްގުތަކުގައި ވަކާލާތުކުރާ އެ ގައުމުގެ އަންހެން ކުއްޖަކަށް ބައިނަލްއަގުވާމީ އެވޯޑެއް ލިބިއްޖެ އެވެ.
ތާލިބާނުން 2021 ގައި އަފްގާންގެ ވެރިކަމަށް އައުމާ '30 ބާޑްސް ފައުންްޑޭޝަން" ކިޔާ ޖަމާއަތެއްގެ އެހީތެރިކަމާ އެކީ އެ ގައުމުން ދޫކޮށް ޕާކިސްތާނަށް ހިޖުރަ ކުރުމަށް ފަހު، މިހާރު އާއިލާއާ އެކީ ކެނެޑާގައި ދިރިއުޅެމުން އަންނަ 17 އަހަރުގެ ނީލާ އިބްރާހީމީ އަށް އިއްޔެ ލިބިފައި ވަނީ 'އިންޓަނޭޝަނަލް ޗިލްޑްރެންސް ޕީސް ޕްރައިޒް' އެވޯޑެވެ.
މި އެވޯޑް ކުރިން ލިބުނު މީހުންގެ ތެރޭގައި އަންހެނުންގެ ހައްގުތަކަށް ވަކާލާތުކުރާ ޕާކިސްތާނަށް ނިސްބަތްބާ މަލާލާ ޔޫފުސާއި ސްވިޑްންގެ ކްލައިމެޓް ޗޭންޖް އެކްޓިސްޓް ގްރެޓާ ތަމްބާގް ހިމެނެ އެވެ.
ނީލާ އަށް ގިނަ ބައެއްގެ ސަމާލުކަން އެންމެ ފުރަތަމަ ލިބުނީ ތާލިބާނުންގެ ބާރުގެ ދަށަށް އަފްގާނިސްތާން ދިއުމާ އެކީ އަންހެން ކުދިންނާއި އަންހެނުންނާ ދެކޮޅަށް އެޅި ހަރުކަށި ފިޔަވަޅުތަކުގެ ތެރޭގައި ހިމެނޭ އާންމު ތަންތާނގައި ލަވަ ކިޔުން މަނާކުރުމުން އެކަމާ ދެކޮޅަށް އަޑު އުފުލަން "އައި އޭމް މައި ސޯންގް" ގެ ނަމުގައި ރެކޯޑްކޮށް، ސޯޝަލް މީޑިއާގައި އާންމުކުރަން ފެށި ލަވަތަކުންނެވެ.
އެ ލަވަތަކުގައި ނީލާ ސިފަކޮށް ދެމުން ދިޔައީ އަފްގާންގެ އަންހެން ކުދިންގެ ހާލަތުގެ ވާހަކަ އެވެ. އޭނަގެ ބޭބެ ލައްވައި ރެކޯޑް ކުރުވައި، ސޯޝަލް މީޑިއާ އަށް ދޫކުރަމުން ދިޔަ ވީޑިއޯތަކާ ގުޅިގެން ގިނަ ބައެއްގެ ސަމާލުކަން ނީލާ އަށް ލިބުނެވެ.
އޭނަ އަށް 'އިންޓަނޭޝަނަލް ޗިލްޑްރެންސް ޕީސް ޕްރައިޒް' ލިބުނީ މިހާތަނަށް އަފްގާން އަންހެން ކުދިންގެ ހައްގުގައި ކުރަމުން އައިސްފައިވާ މަސައްކަތުގެ އަގުވަޒަން ކުރުމުގެ ގޮތުންނެވެ.
އެ އެވޯޑާ ގުޅިގެން ނީލާ ބުނީ މިއީ އޭނަ ކުރަމުން އަންނަ މަސައްކަތް މުޅި ދުނިޔެ މިހާރު ބަލައިގަންނަކަމުގެ ހެއްކެއް ކަމަށެވެ. އަދި އެވޯޑާ އެކީ ހިތްވަރު އިތުރަށް އާވެއްޖެ ކަމަށާއި އޭނަގެ އަޑު ދެން ދުވަހަކު ވެސް ނުކެނޑޭނެ ކަމަށް ބުންޏެވެ.
ނީލާ އަށް މި އަހަރުގެ 'އިންޓަނޭޝަނަލް ޗިލްޑްރެންސް ޕީސް ޕްރައިޒް' އެއަށް 47 ގައުމަކުން ވާދަކުރި 165 ފަރާތަކާ ވާދަކޮށެވެ.