ކުރީގެ ރައީސް އަބްދުﷲ ޔާމީން ޖަލުުން ސަލާމަތްވި ހުކުމުން ސުޕްރީމް ކޯޓުގައި އިސްތިއުނާފުކުރި ބައިގެ އަޑުއެހުންތައް އެ ކޯޓުގައި މިއަދު ފަށައިފި އެވެ.
ޔާމީންގެ މައްޗަށް އިއްވާފައިވާ ޖަލު ހުކުމް ބާތިލުކޮށް އެ މައްސަލަ އަލުން ބެލުމަށް ހައިކޯޓުން ކުރި ހުކުމުގެ ބައެއް ޕީޖީ އޮފީހުން ސުޕްރީމް ކޯޓުގައި އިސްތިއުނާފު ކޮށްފައިވަނީ 24 ޖުލައި 2024 ގައެވެ.
ޕީޖީ އޮފީހުން މައްސަލަ އިސްތިއުނާފު ކޮށްފައިވަނީ ހައިކޯޓުގެ ނިންމުމުގައި މައްސަލަ އަލުން ބަލައި ގޮތެއް ކަނޑައަޅަން އެންގިއިރު، ދައުލަތުން ހުށަހެޅި ހެކިތައް އެއްފަރާތްކުރުމަށް އަންގާފައިވާތީއެވެ. އެގޮތަށް ހައިކޯޓުން އެންގީ އެ ހެކިތައް ދަށު ކޯޓަށް ބަލައިގަތުމުގެ އިޖުރާއަތް ރަނގަޅުނޫންކަމަށް ބުނެއެވެ.
މި މައްސަލައިގައި މިއަދު ސުޕްރީމް ކޯޓުގައި ކުރިއަށްގެންދިޔަ އަޑުއެހުމުގައި ޕީޖީގެ ވަކީލް ވިދާޅުވީ ހައިކޯޓުން ނިންމި ނިންމުމަކީ ސުޕްރީމް ކޯޓުން މީގެކުރިން ކަނޑައަޅާފައިވާ ނިންމުމަކާ ހިލާފަށް ނިންމާފައިވާ ނިންމުމެއް ކަމަށެވެ. ދައުލަތުގެ ވަކީލް ވިދާޅުވީ މައްސަލައިގައި އާ ހެކި އެއްފަރާތް ކުރަން ހައި ކޯޓުން އަންގާފައިވާއިރު އެކަމުގައި ހިނގާފައިވަނީ އިޖުރާއީ މައްސަލައެއް ކަމަށެވެ. އަދި އެއީ އިސްލާހު ކުރެވެން އޮތް ކަމެއްކަމަށެވެ.
މި މައްސަލައިގައި ދައުލަތުން ސުޕްރީމް ކޯޓުގައި އެދިފައިވަނީ އެ ހެކިތަކާ ގުޅިގެން ދެ ފަރާތުން ޝަރީއަތުގައި ބަހުސްކުރުމުގެ ފުރުސަތުދީ، އެ ހެކިތައް ބަލައިގަތުމާ މެދު އަލުން ގޮތެއް ކަނޑައެޅުމަށް ދަށު ކޯޓަށް އަންގައިދިނުމަށެވެ.
ދައުލަތުގެ ހުށަހެޅުންތަކާއި ގުޅިގެން ޔާމީންގެ ވަކީލް ވިދާޅުވީ ދައުލަތުން ހުށަހެޅި އިސްތިއުނާފީ ނުކުތާއަކީ ސުޕްރީމް ކޯޓުން މީގެ ކުރިން ކަނޑައަޅާފައިވާ އުސޫލުތަކާ ހިލާފަށް ހުށަހަޅާފައިވާ ނުކުތާއެއް ކަމަށެވެ. އަދި އެއީ އިސްތިއުނާފް އޮޅިގަނޑު ގިރާނުކުރާ ކަމަށް ކަނޑައަޅައިދިނުމަށް އެދިފައިވެ އެވެ. މީގެއިތުރުން ހައިކޯޓުގެ ނިންމުމަށް ބަދަލުގެންނަންޖެހޭތަނެއް ނެތްކަމަށް ކަނޑައަޅައި ދިނުމަށްވެސް އެދިފައިވެ އެވެ.
ދެފަރާތަކުގެ ވާހަކަތައް އަޑުއެއްސެވުމަށްފަހު މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު އާއިޝާ ޝުޖޫން މުހައްމަދު ވިދާޅުވީ މައްސަލައިގައި ދެ ފަރާތުން ނިންމުމުގެ ގޮތުން ވާހަކަ ދެއްކުމަށް އިތުރު އަޑުއެހުމެއް ބާއްވާނެ ކަމަށެވެ. ސުޕްރީމް ކޯޓުގައި މި މައްސަލަ ބައްލަވާ ބެންޗުގައި ހިމެނިވަޑައިގަންނަވަނީ ފަނޑިޔާރު އާއިޝާ ޝުޖޫން މުހައްމަދު، ފަނޑިޔާރު ޑރ. އަޒްމިރާލްދާ ޒާހިރު އަދި ފަނޑިޔާރު ޑރ. މުހައްމަދު އިބްރާހީމް އެވެ.