ގައުމަށް ބޭނުން ވަނީ ގާނޫނުތައް ހެދުމުގައި ރައްޔިތުންގެ މަޖިލިސް މެމްބަރުން ގެންގުޅޭ ހަލުވި ސްޕީޑު ކަމަށް، މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވެއްޖެ އެވެ.
ރައްޔިތުންގެ މަޖިލީހަށް އިންތިހާބުވި ޕާޓީ ބަދަލުކުރުމުން މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ސަރުކާރުގެ ފަރާތުން ހުށަހެޅި އިސްލާހުގެ ބިލު މިއަދު ހެނދުނު ވަނީ މަޖިލީހަށް ހުށަހަޅާފަ އެވެ. އެ ބިލު މިއަދު މެންދުރު މުޅި މަޖިލީހުގެ ކޮމިޓީން ފާސްކުރިއިރު، މިއަދު ހަވީރު 5:30 ގައި މަޖިލީހުގެ ތަޅުމުން ފާސްކުރަން ވަނީ ތާވަލުކޮށްފަ އެވެ.
މިއަދުގެ ޖަލްސާ ނިންމަވާލައްވަމުން އަބްދުލްރަހީމް ވިދާޅުވީ މި ބިލުގެ މަސައްކަތް ވަރަށް ފުރިހަމަ އަށް ކޮށްދެއްވީތީ މުޅި މަޖިލީހުގެ ހުރިހާ މެމްބަރުންނަށް ޝުކުރު އަދާކުރައްވާ ކަމަށެވެ.
"ތިޔަ ބޭފުޅުން ގާނޫނު އަސާސީ އާއި ގާނޫތައް ހެއްދެވުމުގައި ގެންގުޅުއްވާ ހަލުވި ބާރު ސްޕީޑު، އެއީ މިއަދު މި ގައުމަށް ކޮންމެހެން ބޭނުންވާ ކަމެއް ކަމުގައި ދަންނަވަން،" އަބްދުލްރަހީމް ވިދާޅުވި އެވެ.
ސަރުކާރުގެ ފަރާތުން މި އިސްލާހު ގާނޫނުއަސާސީގައި ހިމަނަން ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. މި ބިލު މުޅި މަޖިލީހުގެ ކޮމިޓީން ފާސްކުރީ 75 މެމްބަރުންގެ ވޯޓާއެކު އެވެ. މިކަމާ ދެކޮޅަށް 13 މެމްބަރުން ވޯޓު ދެއްވި އެވެ.
ޤާނޫނުއަސާސީއަށް ހުށަހަޅާފައިވާ އިސްލާހުގައި ބުނެފައިވަނީ ވަކި ސިޔާސީ ޕާޓީއެއްގެ ފަރާތުން މަޖިލީހަށް ވާދަކޮށްގެން އިންތިހާބުވުމަށްފަހު، އެ މެންބަރަކު ރައްޔިތުންގެ މަޖިލީހަށް އިންތިހާބުވި ދައުރުގެ ތެރޭގަައި ތަމްސީލުކުރާ ޕާޓީން އަމިއްލައަށް ވަކިވުން ނުވަތަ އެ ސިޔާސީ ޕާޓީގެ މެންބަރުކަމުން ޤާނޫނުގައި ބަޔާންކުރާ ގޮތުގެ މަތިން ވަކިކުރުން ނުވަތަ އެ މެންބަރަކު ތަމްސީލުކުރާ ސިޔާސީ ޕާޓީ ނޫން އެހެން ސިޔާސީ ޕާޓީއެއްގެ މެންބަރަކަށް ވެއްޖެނަމަ، އެމީހަކު ރައްޔިތުންގެ މަޖިލީހުގެ މެންބަރުކަމުން ވަކިވާނެ ކަމަށެވެ.
އަމިއްލަ ގޮތުން ވާދަކޮށް މެންބަރުކަމަށް އިންތިހާބުވުމަށްފަހު އެ މެންބަރަކު މަޖިލީހަށް އިންތިހާބުވި ދައުރުގެ ތެރޭގައި ސިޔާސީ ޕާޓީއެއްގެ މެންބަރަކަށް ވެއްޖެނަމަ މެންބަރުކަމުން ވަކިވާނެ ކަމަށްވެސް މި އިސްލާހުގައި ބުނެފައިވެ އެވެ.