މަޝްހޫރު ތެލެގޫ އެކްޓަރު ރާމް ޗަރަންއާ އެކީ ބޮލީވުޑްގެ ބަތަލާ ޖާންވީ ކަޕޫރް ކުޅެން ސޮއިކުރި ފިލްމު ރަސްމީކޮށް އިއްޔެ ލޯންޗްކޮށްފި އެވެ.
އެކަމަށްޓަކައި އިއްޔެ ބޭއްވި ހަފުލާއެއްގައި ފިލްމު މަސައްކަތް ފެށުން ލޯންޗްކޮށް ދިނީ ޗަރަންގެ ބައްޕަ މަޝްހޫރު އެކްޓަރު ޗިރަންޖީވީ އެވެ.
ނަން އަދި ރަސްމީކޮށް އިއުލާން ނުކުރާ މި ފިލްމުގެ ވަގުތީ ޓައިޓްލްއަކަށް ބޭނުން ރަނީ ޗަރަންގެ ނަމުގެ ފެށޭ ދެ އަކުރުގެ އިތުރުން 16 އެވެ. މީޑިއާތަކުން ބުނީ "އާރްސީ 16" ގެ ޝޫޓިން ރަސްމީކޮށް ފަށާނީ މާދަމާ ކަމަށާއި ޝޫޓިން ކުރިއަށް ދާނީ މައިސޫރްގައި ކަމަށެވެ.
މި ސްޕޯޓްސް ޑްރާމާގެ ޑައިރެކްޓަރަކީ ތެލެގޫ ޑައިރެކްޓަރު ބުޗީ ބާބޫ ސާނާ އެވެ. އޭނަ ޑައިރެކްޝަނަށް ނުކުތީ 2021 ގެ ރޮމޭންޓިކް ޑްރާމާ "އުޕެނާ" އިންނެވެ. "އާރްސީ 16" އަކީ ބުޗީގެ ދެވަނަ ފިލްމެވެ.
#GulteExclusive:#RamCharan and #JanhviKapoor to begin shooting for #BuchiBabuSana's directorial from November 22 in Mysore.#RC16 pic.twitter.com/TtlXSocvts
— Gulte (@GulteOfficial) November 20, 2024
މި އަހަރުގެ މާޗް މަހުގެ ތެރޭގައި ޖާންވީ ސޮއިކުރި މި ފިލްމަކީ އިންޑިއާގެ ދެކުނު އެކްޓަރަކާ އެކީ ކުރީގެ ބަތަލާ ސްރީދޭވީގެ ދަރިފުޅު ކުޅޭ ދެވަނަ ފިލްމެވެ. ޖާންވީގެ އެންމެ ފަހުގެ ފިލްމަކީ ވެސް ދެކުނުގެ އެކްޓަރަކާ އެކީ ކުޅުނު ފިލްމެކެވެ. އެއީ ސެޕްޓެމްބަރުގައި ރިލީޒްކުރި "ދޭވްރާ: ޕާޓް 1" އެވެ. އޭގެ ބަތަލަކީ 2022 "އާރްއާރްއާރް" ގައި ޗަރަންއާ އެކީ މުހިއްމު ރޯލެއް ކުޅުނު އެންޓީއާރް ޖޫނިއާ އެވެ.
މި މަހުގެ ކުރީކޮޅު ރާއްޖޭގައި ޗުއްޓީ ވެސް ހޭދަކުރި ޖާންވީގެ ކުރިއަށް ހުރި ފިލްމުތަކުގެ ތެރޭގައި ވަރޫން ދަވަނާ އެކީ ކުޅޭ "ސަނީ ސަންސްކާރީ ކީ ތުލްސީ ކުމާރީ" އާއި ސިދާތު މަލްއުތުރާއާ އެކީ ކުޅެން ހަމަޖެހިފައިވާ "ޕަރަމް ސުންދަރީ" ހިމެނެ އެވެ.
ޗަރަންގެ ކުރިއަށް އޮތް ފިލްމަކީ ސިދާތުގެ އަންހެނުން ކިއާރާ އަދުވާނީއާ އެކީ ކުޅެފައިވާ ޑައިރެކްޓަރު އެސް ޝަންކަރްގެ "ގޭމް ޗޭންޖާ" އެވެ. އެ ރިލީޒްކުރާނީ އަންނަ ޖެނުއަރީ 10 ގަ އެވެ.