ފާތިމާ ސަނާ ޝެއިހާއި އާރް މާދްވަން (މެޑީ) ދާދި ފަހުން ސޮއިކުރި ކަރަން ޖޯހަރްގެ ދަރުމާގެ ރޮމޭންޓިކް ކޮމެޑީގެ ނަމަކީ "އާޕް ޖޭސާ ކޮއީ" ކަމަށް ރިޕޯޓްތައް ބުނެފި އެވެ.
ބޮލީވުޑް ހަންގާމާ އޮން ބުނީ މި ފިލްމުގެ ނަމަކަށް ކުރިން "ތަރްކީ" ވެސް ކިޔަން އުޅުނު ކަމަށާއި ނަމަވެސް މިހާރު ފިލްމުގެ ނަމަކަށް "އާޕް ޖޭސާ ކޮއީ" ފައިނަލްކޮށްފައިވާ ކަމަށެވެ. ފާހަގަކޮށްލެވޭ ކަމަކީ އެ ނަން ނަގާފައި ވަނީ ކުރީގެ ތަރި، ފީރޯޒް ޚާންގެ 1980 ގެ ފިލްމު "ގުރްބާނީ" ގެ ލަވަ "އާޕް ޖޭސާ ކޮއީ މޭރޭ ޒިންދަގީ" އިން ކަމެވެ.
ދުވަސްވީ ފިރިހެނަކާއި ޒުވާން އަންހެނަކާ ދެމެދު އުފެދޭ ލޯބީގެ ގުޅުމެއްގެ މައްޗަށް ބިނާކޮށް ހަދާ "އާޕް ޖޭސާ ކޮއީ" އަކީ ދަރުމާގެ ވެބް ކޮންޓެންޓް ގޮފި، ދަރުމެޓިކް އެންޓަޓައިންމަންޓުން ސްޓްރީމިން ޕްލެޓްފޯމަކަށް ހަދާ ފިލްމެކެވެ.
މީގެ ޑައިރެކްޓަރަކީ އެ ސްޓޫޑިއޯގެ 2021 ގެ ރޮމޭންޓިމް ކޮމެޑީ "މީނާކްޝީ ސުންދޭޝްވަރް" ގެ ޑައިރެކްޓަރު ވިވެކް ސޯނީ އެވެ. އޭނަ އަކީ މި މަހުގެ ކުރީކޮޅު ދަރުމާ އިން އިއުލާންކުރި ލޯބީގެ ފިލްމު "ޗާންދު މޭރާ ދިލް" ގެ ވެސް ޑައިރެކްޓަރެވެ. އަންނަ އަހަރު ސިނަމާތަކަށް ގެންނަން ހަމަޖެހިފައިވާ އެ ފިލްމުގެ ތަރިންނަކީ އަނަންޔާ ޕާންޑޭ އާއި ލަކްޝް އެވެ.