މި މަހު ރިލީޒްކުރި "ބޫލް ބުލައްޔާ 3" ގައި މަދޫރީ ޑިކްސިޓާއި ވިދިއާ ބާލަންއާ އެކީ މަސައްކަތް ކުރުމަށް ފަހު، ބޮލީވުޑްގެ ޒުވާން އެކްޓަރު ކާތިކް އާރިއަނަށް ރަވީނާ ޓަންޑަނާ އެކީ ވެސް މަސައްކަތް ކުރުމުގެ ފުރުސަތު ފަހިވެފައިވާ ކަމަށް ރިޕޯޓްތައް ބުނެފި އެވެ.
ބައެއް މީޑިއާތަކުން މިއަދު ބުނެފައިވާ ގޮތުގައި ކާތިކްގެ 2019 ގެ "ޕަތީ، ޕަތުނީ އޯރް ވޯ" ގެ ދެވަނަ ބައިގެ ތައްޔާރީތައްވަމުން އަންނަ އިރު، އޭގައި ރަވީނާ މުހިއްމު ރޯލެއް ކުޅެނޭނެ އެވެ. އެކަމަކު މި ފިލްމު އަދި ރަސްމީކޮށް އިއުލާން ނުކުރާތީ އެކަން އަދި ކަށަވަރެއް ނުވެ އެވެ.
މުދައްސަރު އަޒީޒު ޑައިރެކްޓްކުރި "ޕަތީ، ޕަތުނީ އޯރް ވޯ" އަކީ ހަމަ އެ ނަމުގައި 1978 ގައި ގެނެސްދިން ފިލްމުގެ ރިމޭކެކެވެ. ކާތިކާ އެކީ އާ ފިލްމުގައި ބަތަލާއިންގެ ރޯލު ކުޅުނީ އަނަންޔާ ޕާންޑޭ އާއި ބޫނީ ޕިޑްނޭކަރެވެ. މީޑިއާތަކުން "ޕަތީ، ޕަތުނީ އޯރް ވޯ 2" ގައި ވެސް ބޫމީ ހިމެނޭނެ ކަމަށެވެ
ބޮލީވުޑް ހަންގާމާ އިން ބުނީ މި ފިލްމު އަދި އޮތީ ސްކްރިޕްޓިން މަރުހަލާގައި ކަމަށެވެ. އަދި ޕްލޭން ކުރަނީ އަންނަ އަހަރުގެ ކުރީކޮޅު "ޕަތީ، ޕަތުނީ އޯރް ވޯ 2" ގެ ޝޫޓިން ފަށަން ކަމަށް ވެސް އެ ނޫހުން ބުންޏެވެ. އެ ވެސް ޑައިރެކްޓްކުރާނީ މުދައްސަރު އެވެ.
މިހާރު ވަރަށް މަދުން ނޫނީ ފިލްމުތައް ނުކުޅޭ ރަވީނާ، 52، އަކީ 90 ގެ ތެރޭގައި ބޮލީވުޑްގައި އެންމެ ވިދި އެއް ބަތަލާ އެވެ. އޭނަގެ ރަންޒަމާނުގައި ކާމިޔާބު ގިނަ ފިލްމުތަކެއް ކުޅެފައިވެ އެވެ. ރަވީނާގެ އެންމެ ފަހުގެ ފިލްމަކީ އޮގަސްޓްގައި ރިލީޒްކުރި "ގުޅްޗާޅީ" އެވެ. އޭނަގެ ކުރިއަށް ހުރި ފިލްމުތަކުގެ ތެރޭގައި "ވެލްކަމް ޓު ޖަންގަލް" އާއި "ޖޮލީ އެލްއެލްބީ 3" ހިމެނެ އެވެ.