ޑާކް ރެއިން އެންޓަޓައިންމަންޓްގެ އެންމެ ފަހުގެ ފިލްމު "ބިބީ" އިޓަލީގައި ވެސް އަޅުވަން ތައްޔާރުވެއްޖެ އެވެ.
އިޓަލީ ބަހުން ސަބްޓައިޓްލްކޮށްގެން ފިލްމު އަޅުވަން ހަމަޖެހިފައި ވަނީ އަންނަ މަހުގެ 7 ގަ އެވެ.
"ބިބީ" އެ ގައުމުގައި އެޅުވުމުގައި ޑާކް ރެއިންގެ ފިލްމުތަކުގެ އާންމުކޮށް ސަޕޯޓިން ރޯލުތަކުން ފެންނަ އިޓަލީގެ ބަތަލާ މާރިއާ ތެރީސާގެ ހިއްސާ ބޮޑު ކަމަށް ޑާކް ރެއިނުން ބުންޏެވެ. މި ފިލްމު ވާނީ އިޓަލީގައި އަޅުވާ ފުރަތަމަ ދިވެހި ފިލްމަށެވެ.
ފިލްމު އިޓަލީ އަށް ގެންދާ އިރު، މި މަހުގެ 16 ގައި ސްޕެއިންގައި ވެސް "ބިބީ" ވަނީ ދައްކައިފަ އެވެ.
ހޮރޯ-ކޮމެޑީއެއްގެ ގޮތުގައި މިދިޔަ މަހުގެ 7 ގައި އޮލިމްޕަހުގައި ޕްރީމިއާކުރި މި ފިލްމަކީ އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ، ޑައިރެކްޓްކުރި ފުރަތަމަ ފީޗާ ފިލްމެވެ. "ބިބީ" ގެ ލީޑް ތަރިންނަކީ އޭނަގެ ފިރިމީހާ ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ.
ފިލްމުގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު ޝާއްކޮ (އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.