އައްޑޫ ސިޓީ މަރަދޫގައި އަމިއްލަ ފަރާތަކުން ހިންގާ އެކްއަވެންޗާ ޑައިވިން ސެންޓަރުން ސްކޫބާ ޑައިވިން ކޯސްތަކެއް ކުރިއަށް ގެންދަން ނިންމައި، ބައިވެރިވުމުގެ ފުރުސަތު ހުޅުވާލައިފި އެވެ.
ޖުލައި އަދި އޯގަސްޓް މަހު ކުރު މުއްދަތުގެ ކޯސްތަކެއް ކުރިއަށް ގެންދަން ނިންމާފައިވާއިރު އެގޮތުން ފުރަތަމަ “ސްކޫބާ އޮޕަން ވޯޓަ ޑައިވް” ކޯސް ފެށުމަށް ހަމަޖެހިފައި ވަނީ މި މަހުގެ 27 ގަ އެވެ. މި ކޯހަކީ 4-5 ދުވަހުގެ މުއްދަތަށް ހިންގާ ކޯހެކެވެ.
އައްޑޫގެ ޒުވާނުންނަށް ހާއްސަކޮށްގެން ބާއްވާ މި ކޯހުގައި ބައިވެރިވާން 5،000ރ. ގެ ފީއެއް ދަައްކަން ޖެހޭ އިރު މި ކޯހުގައި ބައިވެރިވުމުގެ ފުރުސަތު ދޭން ހަމަޖެހިފައި ވަނީ 6 މީހަކަށް ކަމަށް އެކްވެންޗާ ޑައިވިން ސެންޓަރުން މައުލޫމާތު ދެއްވައެވެ.
އޮގަަސްޓް މަހު ދެ ކޯހެއް ކުރިއަށް ގެންދަން އެކްއަވެންޗާ ޑައިވިން ސެންޓަރުން ވަނީ ނިންމައިފައެވެ. އެއީ ސްކޫބާ އޮޕަން ވޯޓަ ޑައިވް ކޯހަކާއި ސްކޫބާ އެޑްވާންސް އޮޕަން ޑައިވް ކޯހެކެވެ.
5 ދުވަހުގެ މުއްދަަތަށް ހިންގާ ސްކޫބާ އޮޕަން ވޯޓަ ޑައިވް ކޯސް ފެށުމަށް ހަމަޖެހިފައި ވަނީ އޮގަސްޓަ މަހުގެ 2 ވަނަ ދުވަހު އެވެ. އަދި ސްކޫބާ އެޑްވާންސް އޮޕަން ޑައިވް ކޯސް ފަށަން ހަމަޖެހިފައި ވަނީ އޮގަސްޓް 8 ގަ އެވެ.
އެކްއަވެންޗާ ޑައިވިން ސެންޓަރުން ހިންގާ މި ކޯސްތަކުގައި ބައިވެރިވާން ބޭނުންވާ ފަރާތްތަކުން 7701135 އަދި 7974310 އަށް ގުޅައިގެން ކޯހުގައި ބައިވެރިވުމުގެ ކަންތައް ކުރިއަށް ގެންދެވޭނެ ކަމަށް އެފަރާތުން މައުލޫމާތު ދެއްވައެވެ.