ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަލްފާޟިލް އަބްދުﷲ ޔާމީން އަބްދުލްޤައްޔޫމް އަބަދުވެސް ވިދާޅުވަމުން ގެންދަވާ ވާހަކައަކީ ތިމަން މަނިކުފާނު ޝަރުޢީ ކޯޓުތަކާއި އަދި މިނިވަން މުއައްސަސާތަކަށް ނުފޫޒު ނުފޯރުވާނެ ވާހަކައެވެ.
ރައީސް ޔާމީންގެ މިވާހަކަތައް އަޑު އަހާލުމުން ހިތްތަކަށް ފިނިކަން ލިބިގެން ދިޔަ ނަމަވެސް ދިވެހިރާއްޖޭގެ ސިޔާސީ މަސްރަޚްގައި ހިނގާ ކަންތައްތަކަށް ނަޒަރު ހިންގާލުމުން އެމަނިކުފާނު ރައްޔިތުންނަށް އިތުރުފުޅު ހައްދަވަނީ ތޯ މިވަނީ ސުވާލު އުފެދިފައެވެ.
ޓެރަރިޒަމްގެ ކުށް ސާބިތުވެ 13 އަހަރުގެ ޖަލު ހުކުމެއް ކުރީގެ ރައީސް މުޙައްމަދު ނަޝީދުގެ މައްޗަށް އިއްވުމާއި އެކު ރާއްޖޭގެ ކަންކޮޅުތަކުގައި ތިބި އެމަނިކުފާނުގެ ސަޕޯޓަރުން ވެރިރަށް މާލެ އަށް އެއްވެ ބޮޑެތި މުޒާހަރާ ފެށިއެވެ.
ރައީސް ޔާމީން ވިދާޅުވެފައިވަނީ، ޝަރުޢީ ކޯޓުތަކުން އިއްވާ ޙުކުމްތަކަށް އެމަނކުފާނުގެ ބާރެއް ނުފޯރާ ކަމަށާއި ރައީސް ނަޝީދު އިސްތިއުނާފްގެ މަރުޙަލާ އިޚްތިޔާރު ކުރެއްވުމަށް އެދިވަޑައިގަންނަވާ ކަމަށެވެ.
ކުރީގެ ޑިފެންސް މިނިސްޓަރ ކާނަލް ނާޒިމްގެ ގެކޮޅުން ފެނުނު ކަމަށް ބުނާ 'އެޕެންޑްރައިވް' އާއި 'އެފިސްތޯލަ' އާއި ބެހޭގޮތުން ރައީސް ޔާމީން އަށް އެއްވެސް ކަމެއް އެނގިވަޑައިނުގަންނަވާ ކަމަށް ރައީސް ޔާމީން ވަނީ އަދާލަތު ޕާޓީގެ އިސްވެރިންނާއި އެކު ބޭއްވި ބައްދަލުވުމެއްގައި ވިދާޅުވެފައެވެ.
ދިވެހިރާއްޖޭގެ ރައީސުލްޖުމްހޫރިއްޔާ ކަމުގައި ހުންނެވި ބޭފުޅާއަށް އެނގިވަޑައިނުގެން އެމަނިކުފާނުގެ އެންމެ ގާތް އެކުވެރިއެއްގެ ގޮތުގައި ގިނަ ދުވަސްތަކެއް ވަންދެން ހުންނެވި ދިއްގަރު ދާއިރާގެ މެންބަރ އަޙްމަދް ނާޒިމް ވެސް ވަނީ ޖަލަށް ލެވިފައެވެ.
އެންމެ ފާހަގަކޮށްލެވޭ ތަންކޮޅަކީ މެންބަރ ނާޒިމް ޖަލަށް ލުމަށް ސުޕްރީމް ކޯޓުން ޙުކުމްކޮށްފައި ވަނީ ރައީސް ޔާމީން އާއި އެބޭފުޅާ އާއި ދެމެދު މައްސަލަތަކެއް ޖެހިފައިވާ ކަމަށް ވާހަކަ ދެކެވިފައި ވަނިކޮށެވެ.
ސަރުކާރުގެ އިސް ބޭފުޅުން ބައެއް މީޑިޔާތަކަށް ވިދާޅުވެފައިވާ ގޮތުގައި ރައީސް ޔާމީން އާއި މެންބަރ ނާޒިމްގެ މެދުގައި 'ޓްރަސްޓް އިޝޫތަކެއް' އުފެދިފައިވާ ކަމަށެވެ.
ރައީސްގެ އެންމެ ޒަމާންވީ ރަޙްމަތްތެރިޔާ ޖަލަށް ލެވުނު އިރު އެމަނިކުފާނަށް ކޯޓުތަކަށް ނުފޫޒު ފޯރުވޭނެ ނަމަ އެކަން ހުއްޓުވާނެ ކަމަށް ޕީޕީއެމްގެ އިސްބޭފުޅުން ވަނީ ވިދާޅުވެފައެވެ.
ނަމަވެސް މެންބަރ ނާޒިމް ޖަލަށް ލުމަށް ޙުކުމް ކުރެވިފައިވަނީ ރައީސް ޔާމީން އާއި އެ ބޭފުޅާ އާއި ދެމެދު ޖެހުނު މައްސަލަތަކެއްގެ ރުޅިވެރިކަމުގެ ތެރެއިން ކަމަށް ސިޔާސީ ގިނަ ފަރާތްތަކުން ބުނެފައިވާއިރު ޚުދު ރައީސް ޔާމީން އެވާހަކަތަކަށް އެއްވެސް ކޮމެންޓެއް ދެއްވާފައި ނުވުމަކީ ވެސް ސުވާލު އުފެދޭ ކަމެކެވެ.
މިނިވަން މުއައްސަސާތަކަށް ރައީސް ޔާމީން ނުފޫޒު ނުފޯރުވާކަމަށް ވިދާޅުވި ނަމަވެސް ކަންތައް ވަމުން ގެންދަނީ ދިމާ އިދިކޮޅަށް ކަން ފާހަގަކޮށްލެވެއެވެ. އެކަން އެންމެ ބޮޑަށް ފާހަގަކުރެވިގެންދަނީ ޕްރޮސިކިއުޓާ ޖެނެރަލް މުހުތާޒު މުހުސިން ޢަމަލުތަކުންނެވެ.
އިއްތިފާޤަކުން ނަމަވެސް މުހުތާޒްގެ މަސައްކަތްޕުޅު އަބަދުވެސް ކުރިއަށް ގެންދަވަނީ ސަރުކާރަށް ނުވަތަ ސީދާ ރައީސް ޔާމީނަށް އެންމެ ފާއިދާ ހުރި ގޮތަށް ކަން ފާހަގަކޮށްލެވެއެވެ.
"މޭޑޭ'ގެ މުޒާހަރާގައި އަދާލަތު ޕާޓީގެ ރައީސް ޝެއިޚް އިމްރާން ޢަބްދުﷲ ވާހަކަ ދައްކަވަމުން ،"ޑރ. އަފްރާޝީމް އަލީގެ މަރުގެ މައްސަލަ ހިނގިގޮތް ރައީސް ޔާމީނާއި އަދީބަށް އެނގޭނެ" ކަމަށް ވިދާޅުވުމުން ދަޢުވާކުރުމަށް ޕީޖީ ނިންމެވީ ވެސް ޙުދު ރައީސް ޔާމީން ވިދާޅުވި ގޮތަށެވެ.
ރ. އިފުރު އެއާޕޯޓު ހުޅުވުމަށް ބޭއްވި ރަސްމިއްޔާތުގައި ރައީސް ޔާމީން ވިދާޅުވެފައިވަނީ ޑރ. އަފްރާޝީމްގެ މަރުގެ މައްސަލައިގައި އިމްރާންގެ މައްޗަށް އަމިއްލަ ހައިސިއްޔަތުން އަބުރުގެ ދައުވާއެއް ނުކުރައްވާނެ ކަމަށާއި އޭގެ ބަދަލުގައި ކުރައްވާނީ ޖިނާއީ ދައުވާއެއް ކަމަށެވެ.
ރައީސްގެ ނުފޫޒު ފޯރުވުމެއް ނެތި އިއްތިފާޤަކުން އިމްރާންގެ މައްޗަށް ޖިނާއީ ދަޢުވާ ވެސް ކުރެވުނީއެވެ.
ސިޔާސީ ގޮތުން ރައީސް ޔާމީން އަށް ފައިދާ ހުރި ކަމެއް ކަމުގައި ވާނަމަ ދަޢުވާތައް އަނބުރާ ގެންދިއުމަކީ ކުރައްވަފާނެ ކަމެއްކަން މުހުތާޒު ވަނީ ވަރަށް ފަހުން ސާބިތުކޮށްދެއްވާފައެވެ. 2012 ވަނަ އަހަރު ކްރިމިނަލް ކޯޓުގެ އިސް ގާޟީ ހައްޔަރުކުރި މައްސަލައިގައި އައްޑޫ ސިޓީ، ހިތަދޫ މެދު ދާއިރާގެ މެންބަރު އިބްރާހިމް ދީދީގެ މައްޗަށް ކޮށްފައިވާ ދަޢުވާ އަނބުރާ ގެންގޮސްފައި ވަނީ ވެސް ވަރަށް ހައިރާންކުރުވަނިވި ގޮތަކަށެވެ.
އަބްދުﷲ ގާޟީ ހައްޔަރު ކުރި އޮޕަރޭޝަން ހިންގިއިރު އޮޕަރޭޝަން ކޯޑިނޭޓަރު ކަމުގައި ހުރި ކާނަލް ޒިޔާދުގެ މައްޗަށް ކްރިމިނލް ކޯޓުގައި ކުރިއަށް ގެންދިޔަ ޝަރީއަތުގެ ޙުކުމުގައި ވާ ގޮތުން ކާނަލް ޒިޔާދު އަންގަމުން ދިޔައީ އެ އޮޕަރޭޝަނުގެ ކޮމާންޑަރަށް އޭރު ހުންނެވި މާލެ އޭރިޔާގެ ކޮމާންޑަރު، އިބްރާހިމް މުހައްމަދު ދީދީގެ އެންގެވުންތައް ކަން ހެކިންގެ ހެކިބަހުންނާއި އޭނާ ޝަރީއަތުގައި ދައްކާފައިވާ ވާހަކަތަކުން އެނގޭ ކަމަށެވެ.
ޤާނޫނީ ގޮތުން ބަލާއިރު އިބްރާހިމް ދީދީގެ މައްޗަށް ކުށް ސާބިތުކުރުމަށް ހަމައެކަނި މި ޙުކުމް ވެސް ފުދޭ ކަމަށް ޤާނޫނީ ވަކީލުން ވިދާޅުވެފައި ވާއިރު އިބްރާހިމްދީދީގެ މައްޗަށް ކުރި ދަޢުވާ ކުއްލިގޮތަކަށް އަނބުރާ ގެންގޮސްފައިވަނީ މިހާރު ކުރިއަށްދާ ސިޔާސީ ޕާޓީތަކުގެ މަޝްވަރާތަކަށް މަގު ފަހި ކުރުމަށް އެކަން ކުރުމަށް ރައީސް ޔާމީން އެދިވަޑައިގަތުމުން ނޫންބާއެވެ؟
އަނެއްކާވެސް އިއްތިފާޤުން ރައީސް ޔާމީން އަށް ފާއިދާ ހުރި ގޮތަކަށް ޕީޖީގެ ފަރާތުން ފިޔަވަޅެއް އެޅުއްވީ އެވެ.
ރައީސް ޔާމީންގެ އެންމެ ވަފާތެރި މިނިސްޓަރ އަދީބްގެ ކޮރްޕްޝަނުގެ މައްސަލަތަކާއި ބެހޭގޮތުން ރިޕޯޓެއް ނެރުއްވުމާއި އެކު އޮޑިޓަރ ޖެނެރަލް ކަމުން ނިޔާޒު އިބްރާހިމް ދުރުކުރި ގޮތަށް ބަލާލި ކަމުގައި ވިޔަސް ސަރުކާރުން މިނިވަން މުއްސަސާތަކަށް ބާރު ފޯރުވަން ބޭނުންވާ މިންވަރު ހާމަވެގެންދާނެއެވެ.
ކުރީގެ ރައީސް މުޙައްމަދު ނަޝީދު ގޭ ބަންދަށް ބަދަލުކުރުމަށް ވެސް ރައީސް ޔާމީން ބޭނުންފުޅުވުމާއި އެކު އެހެރީ ގޭ ބަންދަށް ބަދަލު ކުރައްވާފައެވެ.
އޭގެ ބަދަލެއްގެ ގޮތުގައި ރައީސް އާއި ނައިބު ރައީސް ކަމުގެ މަޤާމަށް ކުރިމަތިލާ މީހެއްގެ އުމުރު ދަށް ކުރުމަށް މަޖިލީހަށް ހުށަހެޅުނު އިސްލާޙް ފާސްކުރުމަށް އެމްޑީޕީ އިން ވަނީ އެހީތެރިވެފައެވެ.
ރައްޔިތުންގެ މަޖިލީހަށް ހުށަހެޅިފައިވާ ދިވެހިރާއްޖޭގެ ނައިބު ރައީސް ޑރ.ޖަމީލުގެ އިތުބާރު ނެތްކަމުގެ ވޯޓު ކާމިޔާބު ކުރުމަށް ރައީސް ޔާމީން އާއި ސަރުކާރުގެ އިސްވެރިން ކެތްމަދުވެފައިވާއިރު އެކަން ކާމިޔާބު ކުރެވެން އޮތީ އިދިކޮޅު އެމްޑީޕީ އިން ހުށަހަޅާފައިވާ ޝަރުތުތަކަށް އެއްބަސްވެގެންނެވެ. ރައީސްގެ ނުފޫޒާއި ބާރު ޝަރުޢީ ދާއިރާއަށް ނުފޯރުވާނެ ކަމަށް ކިތަންމެ ގިނައިން ވިދާޅުވި ނަމަވެސް ޖަލުތަކުގައި ތިބި ސިޔާސީ އެންމެހައި ފަރާތްތައް ދޫކޮށްލާ ތަން ވަރަށް އަވަހަށް ފެނިގެންދާނެ ކަމަށް ބެލެވެއެވެ.
ސިޔާސީ ގޮތުން ޤާސިމް އިބްރާހިމްގެ ފަރާތްޕުޅުން ދުއްތުރާތައް ކުރިމަތިވާން ފެށުމުން ދައުލަތަށް ޓެކްސް ނުދައްކާ ކަމަށް ބުނެ އެމަނިކުފާނުގެ ވިޔަފާރިތަކުގެ އެކައުންޓްތައް ފްރީޒް ކޮށް އެގްރިމެންޓްތައް ބާތިލް ކުރިތަން ވެސް ވަނީ ފެނިގެން ގޮސްފައެވެ. ނަމަވެސް އެންމެ ފަހުން ސިޔާސީ ހަރަކާތްތަކުން ދުރަށް ދިޔަކަން ޤާސިމް އިއުލާން ކުރެއްވުމާއި "ހުދު ފޮތި ކޮޅަކަށް" އެ މަނިކުފާނު ވެސް ވަނީ ވެފައެވެ.
ރައީސް ޔާމީން އޯކޭ ވުމުން މީރާގެ އިތުރުން ދައުލަތުގެ ހުރިހާ އިދާރާތަކެއް ވެސް އޯކޭ ވަނީ އެވެ. ރައީސް ޔާމީން ވިދާޅުވަމުން އެގެންދަވަނީ ޝަރުއީ ކޯޓަކަށް އަދި މިނިވަން މުއައްސަސާއަކަށް ނުފޫޒު ނުފޯރުވާނެ ކަމަށެވެ. ނަމަވެސް ޤައުމުގައި ހިނގަމުންދާ ކަންކަމަށް ބަލާލުމުން މުޅި ޤައުމުގައި އޮތީ ރައީސް ޔާމީންގެ ޚުދުމުހުތާރު ވެރިކަމެއް ކަމަށް ގިނަ ރައްޔިތުންތަކެއް ބުނަމުން ގެންދަނީ ސަބަބުތަކެއް ނެތިއެއް ނޫންތޯއެވެ؟
އަދިވެސް އެއް މިސާލެވެ. ދާދި ފަހުން ރައީސް ޔާމީން ރާއްޖޭގެ "ސައްހަ" މީހުން އެންމެ ގިނަ ޕާޓީ އަކީ ޕީޕީއެމްކަމަށް ވިދާޅުވިއެވެ. ޔާމީން އެގޮތަށް ވިދާޅުވީ ޕީޕީއެމްއިން ހުށަހަޅާފައިވާ ފޯމް ތަކުގައި ތަކުގައި ފިންގާޕްރިންޓް ޖަހައި އިލެކްޝަނަށް ހުށަހަޅާފައި ވުމުންނެވެ.
އެވާހަކަ އަޑު އިވުމާއި އެކު އިލެކްޝަން ކޮމިޝަނުން އެހެން ޕާޓީ ތަކަށް މެމްބަރުންގެ ފޯމްތަކުގައި ފިންގަރޕްރިންޓް ޖަހަން އަންގައިފިއެވެ.
އެއާއި އެކު އެންމެ ބޮޑު ޕާޓީ އެމްޑީޕީ މެމްބަރުންގެ އަދަދު 23،058 އަށް ތިރިވީއެވެ. އެޕާޓީގައި މިދިޔަ ޑިސެމްބަރު މަހުގެ ނިޔަލަށް 46،608 މެމްބަރުން ރަޖިސްޓްރީ ވެފައި ތިއްބެވެ.
ރައީސް އެގޮތަށް ވިދާޅުވުމާއި އެކު މިއަދު އެންމެ ބޮޑު ސިޔާސީ ޕާޓީއަށް ޕީޕީއެމް މިވަނީ ވެފައެވެ. ރައީސް ވިދާޅުވާ އެއްޗެއް، ހިތަށް އަރާ ވަޑައިގަންވާ އެއްޗެއް މިއަދު މިވަނީ ގާނޫންތަކަށް ވަމުންނެވެ.
ނުފޫޒެއް ނުފޯރުވައެވެ. ނަމަވެސް އެއީ އިއްތިފާޤެއްބާ؟