ބުއްދިވެރިއަކީ ގިޔާމަތް ދުވަހަށް ތައްޔާރުވާ މީހާ ކަމަށް މިއަދުގެ ހުކުރު ހުތުބާގައި ބުނެފި އެވެ.
ހުތުބާގައި ބުނީ ޤިޔާމަތް ދުވަހު ހިސާބު ބެއްލެވޭނެ ކަމަށާއި ޢަމަލުތައް ވަޒަން ކުރެވޭއިރު، ރެވިއޮށްޓަރެއްގެ މިންވަރުގެ ހެޔޮ ކަމެއް ވިޔަސް އަދި ނުބައި ކަމެއް ވިޔަސް އެ ދުވަހުން ގެނެވޭނެ ކަމަށެވެ. އަދި އެއްވެސް މީހަކަށް އެއްވެސް ކަމަކުން މާތްﷲ ބޭއިންސާފެއް ނުކުރައްވާނެ ކަމަށާއި އެ ދުވަހުން ކަނާތަށް ފަތް ލިބޭނީ ހެޔޮ ޢަމަލުކޮށް އުޅުނު މީހުންނަށް ކަމަށްވާއިރު އުރެދުނު މީހުންނަށް ފަތް ލިބޭނީ އެމީހެއްގެ ވާތަށް ކަމަށް ބުނެފައިވެ އެވެ.
"ބުއްދިވެރި މީހަކީ ތިމާގެ ނަފުސު ހިސާބުކޮށް އަމަލުތައް ވަޒަންކޮށް އަންނަން އޮތް ދުވަހަށް ތައްޔާރުވާ މީހާއެވެ. އަދި ނުކުޅެދުންތެރިއަކީ، ހަވާނަފުސަށް ތަބާވެ، މާތްﷲ ގެ ޙަޟްރަތުން ފޮނި އުންމީދުކުރާ މީހާއެވެ،" ހުތުބާގައި ބުންޏެވެ.
ދުންޔަވީ ޙަޔާތުގައިވާ އެންމެ ބޮޑު ޙަޤީޤަތަކީ، ތިބާ ލޯބިވާ އެންމެތަކުންނާއި، އެއްކޮށްފައިވާހައި ތަކެއްޗެއް ދޫކޮށް، މަރުވެގެން ދާން ޖެހޭނެކަން ކަމަށާއި އެކަމުން ފިލައިގެން ދެވޭނޭ ހަމަ އެކަކު ވެސް ނުހުންނާނެ ކަމަށް ހުތުބާގައި ބުންޏެވެ. އާޚިރަތަށްޓަކައި ދުނިޔޭގައި އުޅޭ ބަޔަކު ކަމުގައި ވާންޖެހޭ ކަމަށާއި ނަމަވެސް އާޚިރަތް ހޯދުމަށް މަސައްކަތްކުރަނީ ވަރަށް މަދު ބައެއް ކަމަށް ބުނެފައިވެ އެވެ.
ގިޔާމަތް ދުވަހު ކޮންމެ ތަނެއްގައި ކޮންމެ ގޮތަކަށް މީހަކު ދުނިޔެ ދޫކޮށްފައި ވިޔަސް އެކަލާނގެ އެމީހަކު މަޙްޝަރުކުރައްވާނެ ކަމަށާއި އެ ދުވަހުން އުފާވެރިކަންހުރީ ހެޔޮ ޢަމަލުކޮށްއުޅުނު މީހާއަށް ކަމަށްވާއިރު މާތް ﷲގެ މަގުން މޫނު އަނބުރައިލި މީހާ އެދުވަހުން ހިތާމަކުރާނެ ކަމަށްވެސް ހުތުބާގައި ބުންޏެވެ.