އިޒްރޭލް ޕާސްޕޯޓް މަނާކުރާ ބިލުގެ މަސައްކަތް އަންނަ ހަފްތާގައި ރޮކެޓް ސްޕީޑޫގައި ކުރިއަށް ދާނެ ކަމަށް ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ވިދާޅުވެއްޖެ އެވެ.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ބިލެއް ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް ނަސީމް ހުށަހެޅީ މިދިޔަ ޖޫން 10 ގަ އެވެ. ނަމަވެސް އެ ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ 100 އަށް ވުރެ ގިނަ ދުވަސް ވެފަ އެވެ.
އިޒްރޭލު ޕާސްޕޯޓު މަނާކުރުމުގެ މަސައްކަތް އަންނަ އަހަރުގެ ފެބްރުއަރީ މަހާ ހަމައަށް ދަންމާލަން 241 ކޮމިޓީން ދާދިފަހުން ވަނީ ފާސްކޮށްފަ އެވެ.
އިޒްރޭލު ޕާސްޕޯޓުގެ މައްސަލަ ނުނިމި ދިގުލައިގެން ގޮސްފައިވާތީ އާންމުން ކަންބޮޑުވުން ފާޅުކުރަމުންދާއިރު މުހައްމަދު އިސްމާއިލް ވިދާޅުވީ އެ ބިލުގެ މަސައްކަތް ބާރަށް ކުރިއަށް ގެންދާނެ ކަމަށެވެ.
"މި ފެށޭ ހަފްތާގައި ރޮކެޓް ސްޕީޑުގައި ގެންދާނަން،" މުހައްމަދު އިސްމާއިލް ވިދާޅުވި އެވެ.
Noon baarah kuriah gendhane inshaa Allah
Mi feshay week ga rocket Speed ga gendhaanan inshaa Allah https://t.co/D37jnIgANZ— Mohamed Ismail (@MPMohdIsmail) November 22, 2024
އިޒްރޭލު ޕާސްޕޯޓު މަނާކުރުން ލަސްވަމުންދާތީ އިދިކޮޅު އެމްޑީޕީ އާއި ގިނަ ރައްޔިތުންގެ ފާޑުކިޔުން ސަރުކާރަށާއި މަޖިލީހަށް ވަނީ އަމާޒުވެފަ އެވެ. އެގޮތުން މިކަން އަވަސްކުރަން ގޮވާލައި މަޖިލިސް ދޮށުގައި އިހުތިޖާޖުތައް ވެސް އަންނަނީ ބާއްވަމުންނެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނުގެ ގާޒާގައި ހިންގަމުންދާ ގަތުލްއާންމުގައި ޝަހީދުވި މީހުންގެ އަދަދު ވަނީ 44،000 އަށް ވުރެ މައްޗަށް އަރާފަ އެވެ.