ރާއްޖޭގެ ޔުނިވާސިޓީތަކުން ކިޔެވުމުން ދީނީ ނަސޭހަތް ދިނުމުގެ ހުއްދަ ދޭން ވިސްނަވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިއަދު ފެށި "ފަތުވާ މަހާސިންތާ" ގެ ތެރޭގައި މިނިސްޓަރު ވިދާޅުވީ ރާއްޖެއިން ތައުލީމު ހާސިލުކޮށްފައިވާ މީހުންގެ ތެރޭގައި ދީނީ ނަސޭހަތް ދިނުމުގެ ގާބިލުކަން ހުރި މީހުން އެބަތިބި ކަމަށެވެ. ނަމަވެސް ދީނީ ނަސޭހަތް ދިނުމުގެ ގަވާއިދު މިހާރު އޮތް ގޮތުން ހުއްދަ ދެވެނީ ބޭރުގެ ޔުނިވާސިޓީއަކުން ކިޔަވާފައިވާ މީހުންނަށް އެކަނިކަން ވިދާޅުވި އެވެ.
"ބައެއް ދަރިވަރުން ކިޔަވާފައިތި ބެނީ އަރަބި ބަހުން. އެ ކުދިންނަށް އަރަބި ބަސް ވެސް އެނގޭ. އިނގިރޭސިބަސް ވެސް އެނގޭ. މައުލޫމާތު ހޯދުމުގެ ރިފަރެންސްތަކަށް ރުޖޫއަވުމުގެ ގާބިލްކަން ވެސް އެމީހުންގެ ޝަހްސިއްޔަތުގައި އެބަހުރި،" މިނިސްޓަރު ވިދާޅުވި އެވެ. "އެކަމަކު އެ މީހުންނަކަށް ނެތް ހުއްދައެއް. ހަމައެކަނި ހުއްދަ މި އޮންނަނީ ބޭރުގެ ޔުނިވަސިޓީތަކުގައި ކިޔަވާ ބޭފުޅުންނަށް އެކަނި."
ޝަހީމް ވިދާޅުވީ އެކަން އެހެން އޮތުމުގެ ސަބަބުން ރާއްޖޭގެ ރަށްރަށުގައި މީހުން އިސްލާމް ދީނާ ދުރުވެގެން ދަނީ އެމީހުންގެ ތެރޭގައި ދީނަށް ހިތްވަރު ދޭނޭ މީހުން ނެތުމުން ކަމަށެވެ. މއެގޮތުން ކޮންމެ ސްކޫލެއްގައި އިސްލާމް ޓީޗަރެއް ހުއްޓަސް އެ މީހުންނަށް ދީނީ ނަސޭހަތް ނުދެވޭ ކަމަށް މިނިސްޓަރު ވިދާޅުވި އެވެ.
ޝަހީމް ވިދާޅުވީ ރާއްޖޭގައި ވައުޒާއި އިރުޝާދާއި ފަތުވާ ދިނުން ދަރަޖަކުރުމާ މެދު އިލްމުވެރިންގެ މަޝްވަރާ ބޭނުންވާ ކަމަށާއި އިސްލާމީ ކަންކަން ހިންގުމުގައި އިލްމުވެރިން ދެއްވާ ލަފާ އަބަދުވެސް އިހުތިރާމު ކުރާނެ ކަމަށެވެ.