ޓެރަރިޒަމްގެ ދައުވާ އުފުލައި މިހާރު ޖަލުގައި ބަންދުކޮށްފައިވާ އަދާލަތު ޕާޓީގެ ރައީސް ޝެއިހް އިމްރާން އާއި ސަރުކާރުން ހުށަހެޅި "ޑީލް" އަށް އެއްބަސްވެވަޑައިނުގެން ޖަލުގައި މަޑު ކުރައްވަން އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ނިންމަވާފައިވާ ކަން އިތުބާރު ހުރި ގޮތަކަށް "އައްޑޫލައިވް"އަށް މައުލޫމާތު ލިބިއްޖެއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި ޝެއިޚް އިމްރާންއަށް ސަރުކާރުން ހުށަހަޅާފައިވާ ޑީލް އަކީ ޖަލު ބަންދުގައި ތިބޭ މީހުން ބޭސް ފަރުވާއަށް ރާއްޖޭން ބޭރަށް ދާ އުސޫލުން 45 ދުވަހަށް އަވައްޓެރި ލަންކާއަށް ދިއުމަށެވެ.
އަދި މި މުއްދަތު ނިމުމަށްފަހު މިހާރު ކޯޓަށް ހުށަހަޅާފައިވާ ދައުވާއާއި މެދު މަޝްވަރާ ކުރާނެ ކަމަށް ސަރުކާރުން ބުނެފައިވާ ކަމަށެވެ. ނަމަވެސް ޝެއިޚް އިމްރާން ވަނީ އެހުށަހެޅުން ގަބޫލް ނުކޮށް ޖަލުގައި މަޑު ކުރެއްވުމަށް ނިންމަވާފައެވެ. އަދި ސަރުކާރުގެ އިހްލާސްތެރިކަމާއި މެދު ވަނީ ސުވާލު އުފައްދާފައެވެ.
މައުލޫމާތު ލިބިފައިވާ ގޮތުގައި ސަރުކާރުން ކުރިއަށް ގެންދާ "މިނިވަން 50" ހަރަކާތާއި ދެކޮޅަށް އިދިކޮޅު ފަރާތްތަކުން ނިކުމެ މުޒާހަރާ ކޮށްފާނެތީ ސަރުކާރުން މިވަނީ ޕާޓީ ތަކާއި އެކު "މަޝްވަރާ" ފަށާފައެެވެ.
ސަރުކާރުގެ އިސް އޮފިޝަލަކު "އައްޑޫލައިވް"އަށް ވިދާޅުވީ ސިޔާސީ ފަރާތްތަކާއި އެކު މިހާރު ފަށާފައިވާ މަޝްވަރާ ތަކަކީ "މިނިވަން 50" ކުލަގަދަކޮށް ސަރުކާރުން ފާހަގަ ކުރުމަށްޓަކައި ކުރިއަށް ގެންދާ މަޝްވަރާތަކެއް ކަމަށެވެ.
ޖަލު ހުކުމުގައި ތިބި ސިޔާސީ ކުށްވެރިންގެ ތެރެއިން އެމްޑީޕީގެ ރައީސް މުހައްމަދު ނަޝީދު އާއި ކުރީގެ ޑިފެންސް މިނިސްޓަށް ދެ ދުވަހެއްގެ ތެރޭގައި ގޭ ބަންދަށް ބަދަލު ކުރުމަށްވެސް ވަނީ ނިންމާފައެވެ.
އަދާލަތު ޕާޓީގެ އޮފިޝަލަކު ރޭ "އައްޑޫލައިވް"އަށް ވިދާޅުވީ ޝެއިހް އިމްރާން ދޫކޮށްލުމުގެ ވިސްނުމެއް ސަރުކާރުން ނުގެންގުޅޭ ކަމަށެވެ. ނަމަވެސް ސަރުކާރުގެ ވިސްނުން ހުރީ ޝެއިޙްގެ މައްޗަށް ޓެރަރިޒަމް ދައުވާ އުފުލައި އޭނާ އަބަދު ހައްޔަރުގައި ބެހެއްޓުމަށެވެ.
ސަރުކާރުން މީގެ ކުރިންވެސް އަދާލަތަށް ވަނީ މިފަދަ ހުށަހެޅުމެއް ހުށަހަޅާފައެވެ. އެގޮތުން އަދާލަތު ޕާޓީ ވަކިން ސަރުކާރާއި މަޝްވަރާކޮށް މިހާރު މާލޭގައި ކުރިއަށްދާ "އަނިޔާވެިރކަން ނިންމުމަށް" ހަރަކާތް ވަގުތުން ހުއްޓާލުމަށް ވަނީ އެދިފައެވެ. އަދި އޭގެ ބަދަލެއްގެ ގޮތުން ޝެއިޚް އިމްރާންއަށް "ލުއެއް" ދިނުމަށް ވަނީ ބުނެފައެވެ.
ސަރުކާރުން އިދިކޮޅު ފަރާތްތަކާއި އެކު މަޝްވަރާ ފަށާފައި މިވަނީ ދިވެހިން "މިނިވަންކަން" ހޯދުމަށް ޖުލައި 26 ވަނަ ދުވަހު ރަށް ރަށުން މާލެއައިސް މުޒާހަރާ ކުރުމަށް ގޮވާލާފައި ވަނިކޮށެވެ.