އިންޑިއާގެ އުއްތަރު ޕްރަދޭޝްގެ ސަބާލްގެ މިސްކިތެއްގެ ސާވޭއަކާ ގުޅިގެން ހިނގި ހަމަނުޖެހުންތަކެއްގައި ހަތަރު މީހަކު މަރުވެ، އިތުރު ބަޔަކު ޒަހަމްވެއްޖެ އެވެ.
މީޑިއާތަކުން ބުނީ މި ހަމަނުޖެހުން ހިނގީ ސަބާލްގައި ހުރި 16 ވަނަ ގަރުނުގެ މިސްކިތެއް ކަމަށްވާ ޝާހީ ޖަމާ މިސްކިތަކީ ކުރިން ހުރި ފައްޅިއެއް ތަޅާލައި ބިނާކޮށްފައިވާ މިސްކިތެއް ކަމަށް ބުނެ ކޯޓަށް ހުށަހެޅި ޕެޓިޝަނަކާ ގުޅިގެން ކޯޓުން މިދިޔަ ހޮނިހިރު ދުވަހު ފެށި ސާވޭއާ ދެކޮޅަށް މުސްލިމުންގެ ބަޔަކު އިއްޔެ ނުކުމެ ހަޅުތާލު ކުރުމާ ގުޅިގެން ކަމަށެވެ.
ހިންދޫން ދައުވާ ކުރާ ގޮތުގައި ޝާހީ ޖަމާ މިސްކިތަކީ ހަރީ ހަރް ކިޔާ ފައްޅިއެއް ނައްތާލުމަށް ފަހު، މުގާލްގެ ރަސްކަމުގެ ތެރޭގައި ބިނާކުރި މިސްކިތެކެވެ.
ނަމަވެސް އެ ދައުވާ ދެކޮޅަށް އިއްޔެ ނުކުތް މުސްލިމުންނާއި ފުލުހުންނާ ދެމެދު ވަރުގަދަ ކުރިމަތިލުންތަކެއް ހިނގާފައިވެ އެވެ. މި ހަމަނުޖެހުންތަކާ ގުޅިގެން އެ ސަރަހައްދުގެ ސްކޫލްތައް ވެސް ވަނީ ވަގުތީ ގޮތުން ބަންދުކޮށްފަ އެވެ.
ބައެއް މީހުން ފަރާތްތަކުން ބުނެފައިވާ ގޮތުގައި ހަމަނުޖެހުންތަކުގައި މަރުވި ހަތަރު މީހުންނަކީ ފުލުހުން ބަޑިން ދިން ހަމަލާތަކެއްގައި މަރުވި ބައެއް ކަމަށެވެ. ނަމަވެސް ސަބާލްގެ ފުލުހުންގެ ސްޕްރިންޑެންޓް ކްރިޝަން ކުމާރު އެކަން ދޮގު ކުރައްވާފައިވެ އެވެ. އޭނަ ވިދާޅުވީ ހަޅުތާލަށް ނުކުތް މީހުންނާ ދެކޮޅަށް ފުލުހުން އެއްވެސް ހަތިޔާރެއް ބޭނުންކޮށްފައި ނުވާ ކަމަށެވެ.
އިންޑިއާގައި ހުރި ބައެއް މިސްކިތްތަކަކީ ހިންދޫންގެ ފައްޅިތަކެއް ނައްތާލައި ބިނާކޮށްފައިވާ މިސްކިތްތަކެއް ކަމަށް ހިންދޫން އަބަދު ވެސް ދައުވާކުރެ އެވެ. އަދި މިފަދަ ދައުވާތަކާ ހެދި ހިންދޫންނާއި މުސް،ލިމުންނާ ދެމެދު އަބަދު ވެސް ކުރިމަތިލުންތައް ހިނގަ އެވެ.