ދެކުނުގެ އަތޮޅުތަކަށް ޚާއްސަކޮށްގެން އައްޑޫގައި އިކުއިޓީ ޗެމްބަރސްގެ ލޯ ފާމްގެ ބްރާންޗެއް ޤާއިމުކޮށްފިއެވެ. އިކުއިޓީ ޗެމްބަރސްއަކީ މަޝްހޫރު ޤާނޫނީ ވަކީލު އަލްއުސްތާޛް ޢަބްދުﷲ ޝާއިރުގެ މެނޭޖިންގ ޕާޓްނަރ ކަމުގެ ދަށުން ހިނގަމުން އަންނަ ލޯ ފާމްއެކެވެ. މި ލޯފާމްގައި ޤާނޫނީ ވަކީލު ޢަބްދުﷲ ޝާޢިރުގެ އިތުރުން 6 ވަކީލުން މަސައްކަތްކުރެއެވެ.
އައްޑޫލައިވްއަށް މައުލޫމާތު ދެއްވަމުން އިކުއިޓީ ޗެމްބަރސްގެ މެނޭޖިންގ ޕާޓްނަރ އަލްއުސްތާޛް ޢަބްދުﷲ ޝާޢިރު ވިދާޅުވީ އައްޑޫގައި ލޯފާމްއެއް ހެދުމުގެ ބޭނުމަކީ، ފަހުން ޝަރުޢީ ދާއިރާއަށް މިއައި ބަދަލާއި ގުޅިގެން ދެކުނުގެ އަތޮޅުތަކުގެ ރައްޔިތުންނަށް ފަސޭހައިން ޤާނޫނީ ޚިދުމަތް ލިބޭނޭ ގޮތް އިންތިޒާމުކުރުން ކަމަށެވެ. އަދި އިސްތިއުނާފްގެ މުއްދަތަކީ 10 ދުވަސްކަމުގައި މިހާރު ހަމަޖެހިފައިވާއިރު، އިސްތިއުނާފު ކުރަންޖެހޭ ކޯޓު ޤާއިމްވެފައި ހުންނަ ސަރަޙައްދުން ޤާނޫނީ ވަކީލެއްގެ އެހީތެރިކަން އަވަހަށް ނުލިބޭނަމަ އިސްތިއުނާފްކުރުމުގެ ފުރުޞަތު ގެއްލި، އޭގެ ދަތިކަން ރައްޔިތުންނަށް ތަޙައްމަލުކުރަންޖެހޭތީ އެކަމަށް ޙައްލެއް ހޯދައިދިނުމަކީވެސް އެ ފާމުގެ ބްރާންޗެއް އައްޑޫގައި ޤާއިމުކުރުމުގެ އެއް ބޭނުންކަމުގައި އަލްއުސްތާޛް ޢަބްދުﷲ ޝާއިރު ވިދާޅުވިއެވެ.
"މިހާރު ހަމަޖެހިފައި މިއޮންނަ ގޮތުން އިސްތިއުނާފްކުރުމަށް މިލިބެނީ 10 ދުވަހުގެ މުއްދަތެއް. އަޅުގަނޑަށް ވިސްނޭގޮތުގައި ޤާނޫނީ ވަކީލުންގެ އަވަސް އެހީތެރިކަން ނުލިބި މިމުއްދަތުގެ ތެރޭގައި މައްސަލަ އިސްތިއުނާފަށް ހުށަހެޅުމުގައި ދަތިތަކެއް ތަޙައްމަލުކުރަން ޖެހި، އިސްތިއުނާފްގެ ފުރުޞަތު ގެއްލިގެން ހިނގައިދާނެ. އަޅުގަނޑުމެން އައްޑޫގައި މި ޤާއިމުކުރާ އޮފީހުގެ ސަބަބުން އެކަމަށް އިރާދަކުރެއްވިޔާ ވަރަށްބޮޑު ޙައްލެއް ލިބިގެންދާނެ."
އަލްއުސްތާޛް ޢަބްދުﷲ ޝާއިރު އިތުރަށް ވިދާޅުވީ ޤާނޫނީ ވަކީލުންގެ ޚިދުމަތާއި، އެހީތެރިކަން މާލޭގައި ދިރިއުޅޭ ރައްޔިތުންނާ ހަމައަށް ހިފެހެއްޓިފައި އޮވެގެން ނުވާނޭކަމަށާއި، އެޚިދުމަތް ރާއްޖޭގެ އެހެން ރަށްތަކަށްވެސް ލިބޭނޭ ގޮތެއް ހަމަޖެހިފައި އޮންނަންޖެހޭނޭ ކަމަށް ދެކެވަޑައިގަންނަވާކަމަށެވެ.
އައްޑޫގައި ޤާއިމުކޮށްފައިވާ އޮފީހުން ޖިނާއީ އަދި މަދަނީ މައްސަލަތަކުގައި މެޖިސްޓްރޭޓް ކޯޓުތަކުގައި ވަކާލާތުކޮށްދިނުމާއި، އިސްތިއުނާފީ މަރުހަލާތަކުގައި ޤާނޫނީ އެހީތެރިކަން ދިނުމުގެ އިތުރުން، ޤާނޫނީ ގޮތުން ހޭލުންތެރިކުރުމުގެ ޕްރޮގްރާމްތައް އައްޑޫގެ ރައްޔިތުންނާ ގުޅިގެން ހިންގަވާނޭކަމަށްވެސް އަލްއުސްތާޛް ޢަބްދުﷲ ޝާއިރު ވިދާޅުވިއެވެ.