އަލިފާން ނިއްވާ މީހުންގެ މަސައްކަތްތަކަށް ބިނާކޮށް ހަދާފައިވާ ބޮލީވުޑްގެ ފިލްމު "އަގްނީ" އަންނަ މަހު އެމެޒޯން ޕްރައިމް ވީޑިއޯ އިން ޕްރީމިއާކުރަން ނިންމައިފި އެވެ.
މިހާރު ޓްރެއިލާ ވެސް އާންމުކޮށްފައިވާ މި ފިލްމަކީ ކާމިޔާބު ފިލްމުތަކެއް ގެނެސްދީފައިވާ ފަރުހާން އަޚްތަރާއި ރިތޭޝް ސިދުވާނީގެ އެކްސަލް އެންޓަޓައިންމަންޓަށް ރާހުލް ދޮލާކިއާ ލިޔެ، ޑައިރެކްޓްކުރި އެކްޝަން ތުރިލާއެކެވެ.
ދޮލާކިއާ އަކީ އެކްސަލް އިން 2016 ގައި ގެނެސްދިން ޝާހްރުކް ޚާންގެ "ރައީސް" ގެ ވެސް ޑައިރެކްޓަރެވެ.
މާ މަޝްހޫރު ނޫން ކާސްޓުންތަކެއް ހިމެނޭ "އަގްނީ" އެމެޒޯން ޕްރައިމުން ޕްރީމިއާކުރަން ހަމަޖެހިފައި ވަނީ އަންނަ މަހުގެ 6 ގަ އެވެ. މީގެ މައިގަނޑު ކާސްޓްގައި ހިމެނެނީ ޕްރަތީކް ގާންދީ އާއި ދިވްޔެންޑޫ އާއި ސައްޔާމީ ކޭރާއި ޖިތެންދުރަ ޖޯޝީ އާއި ސައީ ތަމްހާކަރެވެ.
އެކްސަލް އިން އެންމެ ފަހުން ގެނެސްދިން ސެޕްޓެމްބަރުގައި ސިނަމާތަކަށް ގެނައި ސިދާންތު ޗަތުރަވެދީގެ އެކްޝަން ތުރިލާ "ޔުދުރާ" އެވެ.
އެ ސްޓޫޑިއޯ އަކީ "ދިލް ޗާތާ ހޭ" އާއި "ޑޮން" އާއި "ތަލާޝް" އާއި "ރޮކް އޯން" އާއި "ޒިންދަގީ ނާ މިލޭގީ ދުބާރާ" އާއި "ދިލް ދަޅަކް ނޭ ދޯ" އަދި "ގަލީ ބޯއި" ފަދަ މަގުބޫލު ފިލްމުތައް ގެނެސްދިން ސްޓޫޑިއޯ އެވެ.