އައްޑޫގެ އަވަށްތަކެއްގެ ހޭޅިފަށް ނައްތާލަމުންދާ ބުނެ އެ މައްސަލަ ބަލައި ދިނުމަށް ޖަމިއްޔާތަކުން ގޮވާލައިފި އެވެ.
އެ މައްސަލަ ބެލުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އަށާއި ކަމާ ގުޅުން ހުރި އިދާރާތަކަށް ހުށަހެޅީ ސޭވް މޯލްޑިވްސް އާއި ޒީރޯ ވޭސްޓް މޯލްޑިވްސްގެ އިތުރުން އިކޯ ކެއާ މޯލްޑިވްސް ގުޅިގެންނެވެ.
ޖަމިއްޔާތަކުން ބުނެފައި ވަނީ އައްޑޫގެ ހިތަދު އާއި ހުޅުދު އާއި މީދޫ އަދި ގައުކެނޑި އާއި ހަންކެޑެ ފަދަ ރަށްތަކުގެ ހޭޅިފަށަށް ބޮޑެތި ގެއްލުންތަކެއް އައްޑޫ ސިޓީ ކައުންސިލުން ދީފައިވާ ކަމަށެވެ. އެގޮތުން އެތަންތަނުގެ ވެށި ކައުންސިލުން ހަލާކު ކުރަމުން ދަނީ އެންވަޔަރަމަންޓް ޕްރޮޓެކްޝަން އެޖެންސީ އީޕީއޭ) ގެ ހުއްދަ ވެސް ނުހޯދައި އަދި އެންވަޔަރަމަންޓް އިމްޕެކްޓް އެސެސްމަންޓް (އީއައިއޭ) ވެސް ނުހަދައި ކަމަށް ފާހަގަކޮށްފައިވެ އެވެ.
"ހޭޅިފަށް ނައްތާލުމުގެ އިތުރުން، ހިތަދޫގެ ތާރީހީ ރުއްފަށާ އާއި ޝަރަފުއްދީން ސްކޫލް ސަރަހައްދުގައި ހުރި ޒަމާންވީ ގަސްތަކާއި ގަމުގައި ހުރި ދުވަސްވީ ބޮޑެތި ގަސްތައްވެސް ވަނީ ނައްތާލާފައި،" ޖަމިއްޔާތަކުން ބުންޏެވެ.
އަދި ހިތަދޫގެ ފެހެލިކިޅީގެ ބައެއްގެ އިތުރުން، މެދެއާރިކިޅިއާއި އިންވެގެން އޮތް ގަސްގަހާގެހީގެ ބަފަ ޒޯން ވެސް ވަނީ ނައްތާލަން ފަށާފައިވާ ކަމަށް ބުނެފައުވެ އެވެ. އެވެ.
މީގެ އިތުރުން ގޯތި ދޫކުރުމަށް ގަސްތައް ކަނޑާލަމުން ޖެހޭ ކަމަށް ކައުންސިލުން ބުނި ނަމަވެސް، އެއީ ބަލައިގަނެވޭނެ ކަމެއް ނޫން ކަމަށް ވެސް ޖަމިއްޔާތަކުން ބުންޏެެވެ.