އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި 56.6 ބިލިއަން ރުފިޔާގެ ބަޖެޓު މަޖިލީހުން މިއަދު ފާސްކޮށްފި އެވެ.
ފިނޭންސް މިނިސްޓަރު މޫސާ ޒަމީރު އެ ބަޖެޓް ހުށަހެޅުއްވީ މިދިޔަ މަހުގެ 31، ގަ އެވެ. އަދި ބަޖެޓަށް ބަހުސްކޮށް ނިމުނީ މި މަހުގެ 16 ގަ އެވެ.
މިއަދު އޮތް މަޖިލީހުގެ ޖަލްސާގައި ބަޖެޓު ފާސްކުރީ 70 މެންބަރުންގެ ވޯޓާއެކު އެވެ. ބަޖެޓާ ދެކޮޅަށް 11 މެންބަރަކު ވޯޓު ދެއްވި އެވެ.
ބަޖެޓް މިއަދު ފާސްކުރި އިރު، އެ ބަޖެޓްގައި ކުރަން ރާވާފައި ހުރި ކަންކަމުގެ ތަފުސީލުތައް ނެތް ކަމަށް ވިދާޅުވެ އިދިކޮޅު އެމްޑީޕީގެ މެންބަރުންގެ އިތުރުން ވެރިކަން ކުރާ ޕާޓީ، ޕީއެންސީގެ ބައިވެރިއެއް ކަމަށްވާ އެމްޑީއޭގެ މެންބަރުން ވެސް ކަންބޮޑުވުން ފާޅުކޮށް، ބަޖެޓަށް ވޯޓް ނުދެއްވާނެ ކަމަށް ވިދާޅުވެފައިވެ އެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި އަންނަ އަހަރުގެ ބަޖެޓަކީ ރާއްޖޭގައި އޮތް އެންމެ ބޮޑު އިޖުތިމާއީ އެއް މައްސަލަ ކަމަށްވާ ބޯހިޔާވަހިކަމަށް ވަރަށް ހާއްސަ ބަޖެޓެއް ކަމަށެވެ.