އައްޑޫ ސިޓީގައި 2011 ވަނަ އަހަރުގެ ސާކް ސަމިޓަށް ބިނާކުރި އިކުއިޓޯރިއަލް ކޮންވެންޝަން ސެންޓަރުގައި ހުރި ގިނަ އަދަދެއްގެ ގޮނޑިއާއި އެހެނިހެން ބައެއް ސާމާނު މާލެ ގެންދިއުމުގެ މަސައްކަތް ހޯމް މިނިސްޓްރީގެ ފަރާތުން ކުރަމުން އެބަގެންދެއެވެ.
މިގޮތުން އީސީސީގެ މެއިން ހޯލްގައި ހުރި ގޮނޑިތަކުގެ ތެރެއިން 850 ގޮނޑި މިވަގުތު ވަނީ އައްޑޫ އިން މާލެ އަށް ގެންދިއުމަށްޓަކައި ހިތަދޫ ބަނދަރުގައި މިވަގުތު އޮތް 'އާގަލާ ކުއީން' ނަމަކަށް ކިޔާ ބޯޓަކަށް އަރުވާފައެވެ.
އިތުބާރު ހުރި ގޮތެއްގައި 'އައްޑޫލައިވް' އަށް އެނގިފައިވާ ގޮތުގައި ގޮނޑީގެ އިތުރުން އީސީސީ އިން ގެންދިޔަ އެހެނިހެން ބައެއް ސާމާނު ވެސް މާލެ ގެންދިއުމަށް ވަނީ އެ ބޯޓަށް އަރުވާފައެވެ. އޭގެ ތެރޭގައި ކޮމްޕިއުޓަރ ސިސްޓަމް ތަކަކާއި ޓީވީ ތަކެއް ވެސް ހިމެނޭ ކަން 'އައްޑޫލައިވް' އާއި މައުލޫމާތު ޙިއްސާކުރި ފަރާތުން ވަނީ ބުނެފައެވެ.
މިނިވަން 50 ގެ ރަސްމީ ޖަލްސާގައި ބޭނުންކުރުމަށް އީސީސީގައި ހުރި ބައެއް ގޮނޑިތަކެއް ގެންދިއުމުގެ މަސައްކަތް ކުރަމުން ގެންދާއިރު މީގެ ކުރިން ޕީޕީއެމްގެ ޖަލްސާއެއްގައި ބޭނުންކުރުމަށް ވެސް އީސީސީގައި ހުރި ގޮނޑިތައް ގެންގޮސްފައިވާ ކަން ފާހަގަކޮށްލެވެއެވެ.