ރާއްޖޭގެ އެކުވެރިއެއްގެ ގޮތުގައި ދެމި ހުންނަވާނެ ކަމަށް އިންޑިއާ އިން ރާއްޖެއަށް ކަނޑައަޅާފައި ހުންނަވާ ސަފީރު، މުނޫ މަހާވަރު ވިދާޅުވެއްޖެ އެވެ.
އިންޑިއާ ސަފީރުގެ ދައުރު ހަމަވެ އެނބުރި ގައުމަށް ވަޑައިގެންނެވުމުގެ ކުރިން މިއަދު ވަނީ ފޮރިން މިނިސްޓަރު ޑރ. އަބްދުﷲ ހަލީލުގެ އަރިހަށް ވަދާއީ ޒިޔާރަތެއް ކުރައްވާފަ އެވެ.
މިއަދު ހެނދުނު ފޮރިން މިނިސްޓްރީގައި ބޭއްވި މި ބައްދަލުވުމުގައި މިނިސްޓަރު ޚަލީލް ވަނީ ދެޤައުމުގެ ގުޅުން ބަދަހިކުރުމަށް، ދެޤައުމުގެ ދޭދޭ ފަރުދުން މެދުގައި އާއި ވިޔަފާރީގެ ގުޅުން ބަދަހިކުރުމާއި، ދެގައުމުގެ މެދު މުއާމަލާތްތަކަށް މަގުފަހިކޮށްދިނުމުގައި ސަފީރު އަދާކުރެއްވި މުހިންމު ދައުރަށް ތައުރީފު ކުރައްވާފަ އެވެ.
އަދި ރާއްޖޭގެ އުމްރާނީ ތަރަށްގީގެ ބިޔަ މަޝްރޫއުތައް އަދި މުހިންމު ރަށްރަށުގެ ފަރުދީ ތަރަށްޤީއަށް – ކޮމިއުނިޓީ ޑިވެލޮޕްމަންޓް މަޝްރޫއުތައް ކުރިއެރުމަށްޓަކައި އިންޑިއާ ސަރުކާރުން ދެއްވާ އެހީތެރިކަން ވެސް ފާހަގަކުރެއްވި އެވެ. އަދި ރޫޕޭ ކާޑު އޮޕަރޭޝަނަލައިޒް ކުރުމާއި، ޔޫޕީއައި ތައާރަފް ކުރުމާއި، ލޯކަލް ކަރަންސީ ޓްރޭޑް އެގްރީމަންޓްތައް ފަދަ މައިލްސްޓޯންތަކަކީ އިގްތިސާދަށް އެޅުނު ހަރުދަނާ ފިޔަވަޅެއް ކަމަށް ހަލީލު ވިދާޅުވި އެވެ.
އިންޑިއާ ސަފީރު ވަނީ އެމަނިކުފާނުގެ މަސައްކަތުގައި ދިވެހި ސަރުކާރާއި، ރައްޔިތުން ދެއްވި ފުރިހަމަ އެއްބާރުލުމާއި ބެހެއްޓެވި ގާތްކަމަށް އިޚްލާޞްތެރިކަމާއެކު ޝުކުރު އަދާކުރައްވާފަ އެވެ. އިންޑިއާ އާއި ރާއްޖޭގެ ގުޅުން ކުރިއަށް އޮތްތަނުގައި ކުރިއަރައި ތަނަވަސްކަންމަތީ ދެމިއޮތުމަށް އުންމީދު ކުރައްވައި، ރާއްޖޭގެ ދެމިހުންނަނިވި އެކުވެރިއެއް ކަމުގައި ދެމިހުންނާނެ ކަމަށް ވިދާޅުވެފަ އެވެ.
މީގެއިތުރުން މި ބައްދަލުވުމުގައި ދެ ބޭފުޅުން ވަނީ ފާއިތުވެދިޔަ އަހަރުގެ ފާހަގަކޮށްލެވޭ ކާމިޔާބީތަކަށް އަލިއަޅުވާލައްވައި، ރައީސުލްޖުމްހޫރިއްޔާގެ ފުރަމާނަ ދަތުރުފުޅުގައި އެއްބަސްވެވުނު ކަންކަމާއި މެދު މަޝްވަރާކުރައްވާފަ އެވެ.