އިންޑިއާގެ ކުރީގެ ރަންއަޑުގެ ވެރިޔާ މުހައްމަދު ރަފީއުގެ ހަޔާތުގެ ވާހަކަ ފިލްމަކުން ކިޔައި ދޭން ނިންމައިފި އެވެ.
އޭނަގެ އާއިލާ އިން މިކަން އިއުލާންކުރީ 55 ވަނަ ގޯއާ އިންޓަނޭޝަނަލް ފިލްމު ވެސްޓިވަލް އޮފް އިންޑިއާ (އައިއެފްއެފްއައި) ގައި ރަފީއަށް ދިން ޓްރިބިއުޓްގެ ތެރޭގަ އެވެ. އެގޮތުން ރަފީގެ ދަރިއެއް ކަމަށްވާ ޝާހިދު ރަފީ ބުނީ ބައްޕަގެ ބައޮގްރަފިކަލް ޑްރާމާ އަންނަ މަހުގެ ތެރޭގައި ރަސްމީކޮށް އިއުލާން ކުރާނެ ކަމަށެވެ.
އޭނަ ބުނި ގޮތުގައި ފިލްމު ޑައިރެކްޓް ކުރަން ހަވާލުކޮށްފައީ ވަނީ ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި އަކްޝޭ ކުމާރުގެ "އޯއެމްޖީ" ގެ ދެ ފިލްމު ގެނެސްދިން އުމޭޝް ޝުކްލާއާ ކަމަށެވެ.
އިންޑިއާގައި މިހާތަނަށް އެންމެ މޮޅެތި އަދި ހިތްގައިމު ފިރިހެން އަޑުގެ ތެރޭގައި ހިމެނޭ ރަފީގެ ކެރިއަރުގައި އަބަދަށް ފެހި އެތައް ލަވައެއް ކިޔާފައިވެ އެވެ. އޭނަ އަކީ 1940 ގެ އަހަރުތަކުން ފެށިގެން 1980 ގެ އަހަރުތަކާ ހަމައަށް މަޝްހޫރު އެތައް ލަވައެއް ކިޔާފައިވާ ފަންނާނެކެވެ.
ފަނޑުވުމެއް ނާންނަ އަޑެއްގެ ގޮތުގައި ފާހަގަކޮށްލެވޭ ރަފީ ވަނީ އުމުރުން 55 އަހަރުގައި ޖުލައި 31، 1980 ގައި މަރުވެފަ އެވެ. އެ ފަންނާނަކަށްޓަކައި އިންޑިއާ އަބަދު ވެސް ފަހުރުވެރިވާ ރަފީގެ ކެރިއަރުގައި ރެކޯޑްކުރި ލަވަަތަކުގެ އަދަދު 7،000 އަށް އަރަ އެވެ. އޭނަ އަކީ އިންޑިއާގައި ވާހަކަ ދައްކައި އުޅޭ ހުރިހާ ބަޔަކުން ލަވަކިޔާފައިވާ މީހެކެވެ.