އަންހެނެއްގެ ފޭސްބުކް އެކައުންޓް ހެކްކޮށްގެން ފައިސާ ހޯދާ އެ މައްސަލައެއް ފުލުހުން ބަލަން ފަށައިފި އެވެ.
ފުލުހުން މިއަދު ބުނީ އިއްޔެ އަންހެނެއްގެ ފޭސްކުބް އެކައުންޓް ހެކްކޮށްގެން އެ އަންހެން މީހާގެ ނަމުގައި އެހެން މީހުންގެ އަތުން ފައިސާ ހޯދަމުންދާ ކަމަށް ލިބުނު މައްސަލަ މިހާރު އިތުރަށް ތަހުގީގު ކުރަމުން އަންނަ ކަމަށެވެ.
ނަމަވެސް މިކަމާ ގުޅޭ އިތުރު އެއްވެސް ތަފުސީލެއް ފުލުހުން ނުދެ އެވެ.
ފަހަކަށް އައިސް މިފަދަ ގޮތްގޮތަށް މީސްމީހުންގެ އަތުން ފޭރޭ މައްސަލަތައް ވަރަށް ގިނަ އެވެ. އެގޮތުން، މި އަހަރު ފުރަތަމަ އަށް މަސް ދުވަހުގެ ތެރޭގައި މަކަރާއި ހީލަތް ހަދައިގެން މީހުން އަތުން ގެއްލުނު 2.2 މިލިއަން ރުފިޔާ އަނބުރާ ހޯދާފައިވާ ކަމަށް ފުލުހުން ބުނެފައިވެ އެވެ. އަދި އެފަދަ މައްސަލަތަކާ ގުޅިގެން މި އަހަރު 500 އަށް ވުރެ ގިނަ ބޭންކް އެކައުންޓް ބްލޮކްކޮށްފައިވެ އެވެ.
ތަފާސްހިސާބުތައް ދައްކާ ގޮތުން، މިދިޔަ އަހަރު އެކަނި ވެސް އޮޅުވާލައިގެން ފައިސާ ހޯދުމުގެ 1،661 މައްސަލައެއް ފުލުހުންނަށް ރިޕޯޓުކުރިއެވެ. އަދި މައްސަލަތަކުގައި 20 މިލިއަން ރުފިޔާ ގެއްލިފައިވާ ކަމަށް ފުލުހުން ބުނެފައިވެ އެވެ.