Last Updated: April 3, 22:50
Thursday, April 3, 2025
ޚަބަރު

ގްލޯބަލް ސިޓިޒަން އެވޯޑް ނަޝީދަށް

މި އަހަރުގެ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދަށް ލިބިވަޑައިގެންފި އެވެ.

މި އެވޯޑަކީ ހެންލީ އެންޑް ޕާޓްނާސް އާއި އަންޑަން ފައުންޑޭޝަން ގުޅިގެން ކޮންމެ އަހަރަކު ދޭ އެވޯޑެކެވެ. އެ އެވޯޑް ނަޝީދަށް އެރުވީ ސިންގަޕޫރުގައި ކުރިއަށްދާ 18 ވަނަ ގްލޯބަލް ސިޓިޒަންޝިޕްގެ ކޮންފަރެންސްގެ ގާލާ ރިސެޕްޝަންގެ ތެރެއިން އެވެ.

މި އެވޯޑު ނަޝީދަށް ލިބިފައިވަނީ މޫސުމަށް އަންނަ ބަދަލުތަކާއި، އިންސާނިއްޔަތަށް ކުރައްވާ މަސައްކަތްތަކަށް ކަމަށް އެ އެވޯޑު ދޭ ފަރާތުން ބުނެފައިވެ އެވެ. އަދި އެ މަސައްކަތްތަކުން ދުނިޔޭގެ ފެންވަރުގައި ފާހަގަކުރެވޭ ކުރިއެރުންތަކެއް ހޯދާފައިވާ ކަމަށް ވެސް ބުނެފައިވެ އެވެ.

މި އެވޯޑާ އެކު ނަޝީދަށް ލިބިވަޑައިގަންނަވާނީ ހާއްސަ މެޑެއްޔަކާއި ސެޓްފިކެޓެއްގެ އިތުރުން 20،000 ޑޮލަރެވެ.

އެ އެވޯޑް ލިބިވަޑައިގެންނެވުމާ ގުޅިގެން ނަޝީދު ވިދާޅުވީ އެއީ ވަރަށް ބޮޑު ޝަރަފެއް ކަމަށާއި ހަގީގީ ބަދަލެއް ގެނެވޭނީ އެންމެން ގުޅިގެން ކުރާ މަސައްކަތުން ކަމަށެވެ.

ނަޝީދު މިހާރު ގެންދަވަނީ ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކްރެޓަރީ ޖެނެރަލްގެ މަގާމު ފުރުއްވަމުންނެވެ.