މި އަހަރުގެ މިހާތަނަށް އިންޑިއާގެ އެކި އެއާލައިންތަކާއި އެއާޕޯޓްތަކަށް ގިނަ އަދަދެއްގެ ބޮމުގެ އިންޒާރު ދީފި އެވެ.
މިކަން އެ އެ ގައުމުގެ ގާނޫނު ހަދާ މަޖިލީހުގައި ހާމަކުރައްވައި ޑެޕިއުޓީ ސިވިލް އޭވިއޭޝަން މިނިސްޓަރު މުލީދާރު މޮހޮލް ވިދާޅުވީ މި މަހުގެ 14 އާ ހަމައަށް އެއާލައިންތަކާއި އެއާޕޯޓްތަކުގައި ގޮއްވައިލާނެ ކަމަށް ބުނެ ދިން އިންޒާރުތަކުގެ އަދަދު 999 އަށް އަރާ ކަމަށެވެ. އަދި މިއީ ފާއިތުވި އަހަރު ލިބުނު އެފަދަ އިންޒާރުތަކާ އަޅާބަލާ އިރު 10 ގުނަ އިތުރު އަދަދެއް ކަމަށް ވެސް ވިދާޅުވި އެވެ.
މޮހޮލް ވިދާޅުވި ގޮތުގައި އެންމެ ގިނަ އިންޒާރުތައް ލިބުނީ މިދިޔަ މަހުގެ ފަހު ދެ ހަފުތާގެ ތެރޭގަ އެވެ. އެއާލައިންތަކާއި އެއާޕޯޓްތަކަށް ބޮމުގެ އިންޒާރު ތަކުރާރުކޮށް ދެމުންދާތީ ކަންބޮޑުވުން ފާޅުކޮށް މިނިސްޓްރީން ބުނީ މިދިޔަ މަހުގެ ފަހު ދެ ހަފުތާގައި ލިބުނު އިންޒާރުތަކަކީ ރެކޯޑް އަދަދެއްގެ އިންޒާރުތަކެއް ކަމަށެވެ.
މީގެ ސަބަބުން ފްލައިޓްތަކުގެ ޝެޑިއުލްތަކަށް ބުރޫ އަރައި، އޭވިއޭޝަން ދާއިރާގެ މުޅި އޮޕަރޭޝަނަށް ވަރަށް ބޮޑެތި ދަތިތަކާއި ގޮންޖެހުންތައް ކުރިމަތިވެ، ދަތުރުކުރާ މީހުންގެ ހިތްތަކުގައި ބިރުވެރިކަން ވެސް އުފެދިފައިވާ ކަމަށް މިނިސްޓްރީން ބުންޏެވެ. ނަމަވެސް އިންޒާރުތަކާ އެއްގޮތަށް އެއްވެސް އެއާލައިނާއި އެއާޕޯޓަކަށް ހަމަލާ ދީފައި ނުވާ ކަމަށް މިނިސްޓަރު ވިދާޅުވި އެވެ.
އެގޮތުން އިންޒާރުތަކާ ގުޅިގެން ފުލުހުންނަށް މި އަހަރުގެ މިހާތަނަށް 256 މައްސަލައެއް ރިޕޯޓްކުރި އެވެ. އަދި 12 މީހަކު ހައްޔަރުކޮށްފައިވެ އެވެ.
އިންޑިއާގެ އެއާލައިންތަކާއި އެއާޕޯޓްތަކަށް ބޮމުގެ އިންޒާރުދޭތީ ބޮން ތުރެޓް އެސެސްމަންޓް އެކުލަވާލައި ފިޔަވަޅުތަކެއް ވެސް އަންނަނީ އަޅަމުންނެވެ. އޭގެ ތެރޭގައި އެއާޕޯޓްތަކުގައި ބޮމް ޑިސްޕޯސަބަލް ސްކޮޑް އެކުލަލާލުމާއި ގޮވާ އެއްޗެއްގެ ނިޝާނެއް އެއްވެސް އެއާލައިނަކުންނާއި އެއާޕޯޓަކުން ފެނޭތޯ ކުއްތާ ބޭނުން ކުރުމާއި ފުލުހުންނާއި އެމްބިއުލާންސާއި ޑޮކްޓަރުން އެއާޕޯޓްތަކުގައި ހަރަކާތްތެރިވާ މިންވަރު އިތުރުކޮށްފައިވެ އެވެ.