ވާޓިކަލް ފާމިން ފަސް ރަށެއްގައި ކުރިއަށް ގެންދަން އެގްރިކަލްޗަ މިނިސްޓްރީން ނިންމައިފި އެވެ.
މިނިސްޓަރު ޑރ. އައިޝަތު ރަމީލާ ވިދާޅުވި ގޮތުގައި ވާޓިކަލް ފާމިން ކުރިއަށް ގެންދަން ނިންމި ފަސް ރަށަކީ ނ. ކެނދިކުޅުދު އާއި ޅ.ނައިފަރާއި ރ.ހުޅުދުއްފާރާއި އއ. މަތިވެރީގެ އިތުރުން ތ. ކިނބިދު އެވެ.
"މިހާރު މި ދަނީ ވާޓިކަލް ފާމިންގެ ސްޓްރަކްޗާތައް ރާއްޖެ ގެނައުމުގެ މަސައްކަތް ކުރަމުން،" މިނިސްޓަރު ވިދާޅުވި އެވެ. "މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު މިސްޓްރަކްޗާތަކުގެ މަސައްކަތް ނިމިގެން ޢަމަލީ ގޮތުން ރަށްރަށުގައި މަސައްކަތް ފެށޭނެ."
ރަމީލާ ވިދާޅުވީ މި މަޝްރޫޢުގެ ދަށުން ގެންނަ ސްޓްރަކްޗާތައް ގެނައުމަށް ފަހު ރަށްރަށުގެ ރައްޔިތުންނަށް ވާޓިކަލް ފާމިންގެ ތަމްރީންތައް ދޭން ފެށުމަށް ރާވާފައިވާ ކަމަށެވެ. އަދި އެ ސިސްޓަމްތައް ބޭނުންކޮށްގެން ގަސް ހެއްދުމަށް ބޭނުންވާ ފަންނީ އެހީތެރިކަން ވެސް ފޯރުކޮށް ދިނުމަށް ހަމަޖެހިފައިވާ ކަމަށް ވިދާޅުވިއެވެ.
ވާޓިކަލް ފާމިން މަޝްރޫއަކީ ޔޫއެންޑިޕީގެ އެހީގައި ކުރިއަށް ގެންދާ މަޝްރޫޢެކެވެ.
އެގްރިކަލްޗަ މިނިސްޓްރީން ބުނި ގޮތުގައި ވާޓިކަލް ފާމިން އެންމެ ފުރަތަމަ ކުރިއަށް ގެންދާ ފަސް ރަށުގެ ތަޖުރިބާގެ އަލީގައި އެކަން ރާއްޖޭގެ އިތުރު ރަށްތަކަށް ފުޅާކުރާނެ އެވެ.