ބައެއް ގައުމުތަކަށް ޖާސޫސްކޮށްދިންކަމުގެ ތުހުމަތުގައި ޗައިނާގެ ތަޖުރިބާކާރު ނޫސްވެރިޔަކު 7 އަހަރަށް ޖަލަށް މިއަދު ބެއިޖިން ހުކުމްކޮށްފި އެވެ.
މީޑިއާތަކުން ބުނީ އެ ހުކުމް އިއްވީ ޑޮންގް ޔޫޔޫ، 62، ގެ މައްޗަށް ކަމަށެވެ.
ޖަޕާނަށް ޖާސޫސްކޮށް ދިންކަމުގެ ތުހުމަތުގައި އޭނަ 2022 ގައި ހައްޔަރުކުރި އިރު މަސައްކަތް ކުރަމުން ގެންދިޔައީ ޗައިނާގެ ވެރިކަންކުރާ ޕާޓީ، ކޮމިއުނިސްޓް ޕާޓީއާ ގުޅުން ބޮޑު ނޫހެއް ކަމަށްވާ ގުއަންގްމިންގް ޑެއިލީގަ އެވެ. ޔޫޔޫ 2022 ގެ ފެބްރުއަރީގައި ގައި ބެއިޖިން އިން ހައްޔަރުކުރީ ޖަޕާންގެ ޑިލޮޕްމެޓަކާ އެކީ ރެސްޓޯރަންޓެއްގައި އުޅެނިކޮށެވެ. އެއީ އެ އަހަރު އެ ގައުމުގައި ބޭއްވި ވިންޓަ އޮލިމްޕިކްސް ނިންމައިލި ދަނޑިވަޅުގެ ތެރޭގަ އެވެ.
ޔޫޔޫ ހައްޔަރުކުރި ދުވަހު އޭނަ ބައްދަލުކުރި ޖަޕާންގެ ޑިޕްލޮމެޓް ވެސް ހައްޔަރުކުރި އެވެ. ނަމަވެސް ފަހުން އޭނަ ވަނީ ދޫކޮށްލައިފަ އެެވެ.
ޔޫޔޫގެ މައްޗަށް އުފުލި ދައުވާތަކުގެ ތެރޭގައި ހިމެނެނީ ޖަޕާނާއި އެމެރިކާގެ ޑިޕްލޮމެންޓުންނާ ވަރަށް ގާތް ގުޅުމެއް ބާއްވައި، ގައުމުތަކަަށް ޖާސޫސްކުރުމުގެ ދައުވާ އެވެ. މިއަދު ޔޫޔޫ އަށް ހުކުމް އިއްވި އިރު، އޭނަގެ މައްޗަށް ހިންގި ޝަރީއަތް ނިންމައިލީ މިދިޔަ އަހަރުގެ ޖުލައި މަހުގެ ތެރޭގަ އެވެ.
ޔޫޔޫގެ މައްޗަށް މިއަދު އިއްވި ހުކުމާ ގުޅިގެން އާއިލާ އިން ބުނީ ޔޫޔޫގެ މައްޗަށް އިއްވި ނާއިންސާފު ހުކުމެއް ކަމަށެވެ. އަދި މި ހުކުމުން ދައްކުވައި ދެނީ ޗައިނާގެ ނޫސްވެރިންނަށް މިނިވަންކަމާ އެކީ މަސައްކަތް ކުރުމުގެ ފުރުސަތު ނެތްކަން ކަމަށެވެ.
އާއިލާ އިން ބުނި ގޮތުގައި ނޫސްވެރިންނަކީ އެ މީހުންގެ މަސައްކަތުގެ ތެރޭގައި އަބަދު ވެސް އެކި ފެންވަރުގެ، އެކި ގިންތީގެ ގިނަ ބަޔަކާ ބައްދަލުކުރާ ބައެއް ކަމަށާއި ޑިޕްލޮމެޓުންތަކަކާ ބައްދަލުކޮށްގެން ނޫސްވެރިޔަކަށް ޖާސޫސްކުރުމުގެ ދައުވާކޮށް، ނުހައްގުން ޖަލަށް ލުމަކީ މުޅި މީޑިއާ އަށް ވެސް ދިން ވަރަށް ނުރައްކާތެރި އިންޒާރެއް ކަމަށެވެ.