ޑްރަގް ވިޔަފާރީގެ ބޮޑުންނަށް ފިޔަވަޅު އަޅާތަން ރައްޔިތުންނަށް ފެންނާނެ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަދައްކަމުން ސީޕީ ޝުޖާއު ވިދާޅުވީ ރާއްޖެއަށް ޑްރަގު އެތެރެކޮށް ވިޔަފާރިކުރާ ނެޓްވޯކްތަކާއި ޑްރަގު ބޮޑުންނަކީ ކޮބައިކަން ދެނެގަނެ، އެމީހުންގެ މައްޗަށް ރަނގަޅު ތަހުގީގެއް ހިންގުމަށް ވާންޖެހޭ ތައްޔާރީތައް ވަމުންދާ ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ސީޕީ ދެއްވާފައެއް ނުވެ އެވެ.
"އަޅުގަނޑު ދޭނެ ޔަގީންކަމަކީ މި މަސައްކަތް މިފަހަރު އިޚުލާސްތެރިކަމާއި އެކު މި ދެންނެވި ގުރޫޕަށް ޓާގެޓްކޮށް، މިކަމުގައި މި ނެޓްވޯކްތައް ހިންގާ، ބޮޑެތި މީހުންނަށް އަދި މިކަމުގައި ރާއްޖެއަށް މަސްތުވާތަކެތި އެތެރެކުރާ ބޮޑުންގެ ވާހަކަ މިދައްކަނީ. މި މީހުންގެ މައްސަލަތައް ތަހުގީގުކުރެވި މިކަމަށް ރަނގަޅު ފިޔަވަޅުތަކެއް އެޅިގެންދާތަން ދިވެހި ރައްޔިތުންނަށް ފެނިގެންދާނެ،" ސީޕީ ވިދާޅުވި އެވެ.
މަސްތުވާތަކެއްޗާއި ދެކޮޅަށް ކުރާ މަސައްކަތުގައި ރަނގަޅު ނަތީޖާތަކެއް ނެރެވެމުންދާ ކަމަށާއި އެގޮތުން ފާއިތުވި އަހަރުތެރޭ 180 ކިލޯ އަށް ވުރެ ގިނަ މަސްތުވާތަކެތި އަތުލައިގަނެވިފައިވާ ކަމަށް ސީޕީ ވިދާޅުވި އެވެ. އަދި 8400 އަށް ވުރެ ގިނަ ބަނގުރާ (ފުޅިއާއި ދަޅު ހިމެނޭގޮތަށް) އަތުލައިގެންފައިވާ ކަމަށާއި މީ ގާތްގަނޑަކަށް އަގުމަގުކުރާ ކަމަށްވާނަމަ 333 މިލިއަން ރުފިޔާ އަށް ވުރެ ގިނަ ތަކެތި ކަމަށް ވިދާޅުވި އެވެ.
މީގެއިތުރުން މާލޭގައި ޑްރަގް ވިޔަފާރިކުރާ ތަންތަނުގެ ގޮތުގައި ހިމެނޭ 40 ތަނެއް ބަންދުކޮށްފައިވާ ކަމަށްވެސް ސީޕީ ޝުޖާއު ވިދާޅުވި އެވެ.