ސަރުކާރާއި މެދު ހިތްހަމަނުޖެހުން އޮތްކަން ހާމަކުރުން ބޮޑު ކުށަކަށް މިއަދު ވެފައިވާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒު މިހެން ވިދާޅުވީ އެކްސްގައި ކުރި ޕޯސްޓަކާ ގުޅިގެން އެމްޑީޕީގެ އެކްޓިވިސްޓެއް ކަމަށްވާ، ހުސެއިން ޝާފިއު މާދަމާ ފުލުހަށް ހާޒިރުވާން އެންގުމާ ގުޅިގެންނެވެ.
އެކަމާ ގުޅިގެން ފައްޔާޒު ވިދާޅުވީ ޓްވީޓު ކުރާތީ ފުލުސް އޮފީހަށް ހާޒިރުވާން އަންގަން ފަށާފައިވާ ކަމަށާއި ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ވެސް ފިޔަވަޅު އަޅަން ފަށާފައިވާ ކަމަށެވެ. ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެފައިވާ ކަމަށް ފައްޔާޒު ވިދާޅުވި އެވެ.
"ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ. ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ." ފައްޔާޒު ވިދާޅުވި އެވެ.
އެމްޑީޕީގެ އެކްޓިވިސްޓު، ޝާފިއު ފުލުހަށް ހާޒިރުވާން އަންގާފައިވަނީ މާދަމާ މެންދުރު 1:30 އަށެވެ.
ފުލުހުން ޝާފިއު އަށް ފޮނުވި ޗިޓުގައި ބުނީ އޭނާއާ ދެކޮޅަށް ބަލަމުން އަންނަނީ ނޮވެމްބަރު 8، ގައި ހަޑިހުތުރު ބަސް ބޭނުންކޮށްގެން ބިރުވެރިކަން އުފެދޭ ގޮތަށް "އެކްސް" ގައި ޝާފިއު ކުރި ޕޯސްޓެއްގެ މައްސަލަ ކަމަށެވެ.
ޝާފިއު އަކީ އެމްޑީޕީގެ ސޯޝަލް މީޑިއާގައި ވަރަށް ހަރަކާތްތެރި އެކްޓިވިސްޓެކެވެ.