ޓޫރިޒަމް ދާއިރާ އަށް އަލަށް އިންވެސްޓްކުރަން ފެށި، އާ ކުންފުންޏެއް ކަމަށްވާ ސިކްސް އެންޑް ސިކްސް ޕްރައިޓް އައިލޭންޑްސް އިން ރާއްޖޭގައި ހަ ރިސޯޓެއް ތަރައްގީ ކުރަން ނިންމައި، މީގެ ތެރެއިން ބައެއް ރިސޯޓްތަކުގެ ކޮންސެޕްޓް ޑިޒައިން ވެސް ދައްކާލައިފި އެވެ.
އެ ކުންފުނިން ރާއްޖޭގައި ތަރައްގީކުރާ ހަ ރިސޯޓްގެ ތެރެއިން ފުރަތަމަ ދެ ރިސޯޓްގެ ތެރެއިން އެއް ރިސޯޓް އަންނަ އަހަރު، އަނެއް ރިސޯޓް 2026 ގައި ހުޅުވަން ވަނީ ޕްލޭންކޮށްފައިވެ އެވެ.
އަންނަ އަހަރު ހުޅުވަން ހަމަޖެހިފައި ވަނީ 'ރަށް ގިލި މޯލްޑިވްސް' އެވެ. މިއީ 74 ޕޫލް ވިލާ އާއި 38 އޯވަވޯޓާ ވިލާގެ ތަނެކެވެ.
މި ވިލާތަކަކީ ބޮޑުމިނުގައި 120 އަދި 200 އަކަފޫޓް ހުންނާނެ އެންމެ ޒަމާނީ ފެންވަރުގެ ވިލާތަކެވެ. އަދި ކޮންމެ ވިލާއެއްގައި ޕްރައިވެޓް ޕޫލާ އެކީ އެތައް ވަސީލަތްތަކެއް ހުންނާނެ އެވެ.
ދެހާސް ސައްބީހުގައި ހުޅުވަން ހަމަޖެހިފައިވާ ރިސޯޓަކީ 'ދޮން މާގަ މޯލްޑިވްސް' އެވެ. މިއީ 31 އޯވަވޯޓަ ވިލާ އާއި 25 ބީޗް ވިލާގެ ރިސޯޓެކެވެ. ވިލާތަކުގެ ބޮޑިމިން އުޅޭނީ 250-400 އަކަފޫޓާ ދެމެދުގަ އެވެ. އަދި ކޮންމެ ވިލާއެއްގައި ޕްރައިވެޓް ޕޫލާ އެކީ ވެލްނެސް އާއި ޕްރައިވެޓް ޖެޓް ފެސިލިޓީ ވެސް ހުންނާނެ އެވެ.
ސިކްސް އެންޑް ސިކްސް ޕްރައިވެޓް އައިލޭންޑް (sixandsix.com) ގެ ބާނީ/ސީއީއޯ ލައިތު ފެރޯން ވިދާޅުވީ އެ ކުންފުނިން ރާއްޖޭގައި ތަރައްގީކުރާ ރިސޯޓްތަތަކީ ވަރަށް ހިތްގައިމު އަދި ޓޫރިސްޓުންނަށް ވަރަށް ތަފާތު ތަޖުރިބާތަކެއްކޮށްލެވޭނެ ރިސޯޓްތަކަކަށް ވާނެ ކަމަށެވެ. އޭނަ ވިދާޅުވި ގޮތުގައި މި ރިސޯޓްތަކުގެ ކޮންސެޕްޓް ޑިޒައިންތަކަކީ ޓޫރިސްޓުންގެ ޕްރައިވެސީ އަށް ވަރަށް ބޮޑަށް ވިސްނައިގެން ޑިޒައިންކޮށްފައިވާ ރިސޯޓްތަކެކެވެ.
ދުނިޔޭގެ ޓޫރިޒަމްފައި އެންމެ މަޝްހޫރު ގައުމުތަކުގެ ތެރޭގައި ހިމެނޭ ރާއްޖޭގައި މިހާރު ވެސް 170 އަށް ވުރެ ގިނަ ރިސޯޓް ހިންގަ އެވެ. އަދި މިހާރު ވެސް ތަރައްގީ ކުރުމުގެ އެކި މަރުހަލާގަ އާއި ތަރައްގީ ކުރަން ފެށުމުގެ މަރުހަލާގައި ގިނަ ރިސޯޓްތަކެއް އެބަހުއްޓެވެ.
ރާއްޖޭގެ ރިސޯޓްތަކުގެ އެންމެ ހާއްސަ ސިފަ އަކީ "ވަން އައިލޭންޑް، ވަން ރިސޯޓް" ކޮންސެޕްޓެވެ.