ބޭންކް އޮފް މޯލްޑިވްސް (ބީއެމްއެލް) ގެ ޗީފް އޮޕަރޭޓިން އޮފިސަރު (ސީއޯއޯ) އަދި ޑެޕިއުޓީ ޗީފް އެގްޒެކެޓިވް އޮފިސަރު (ސީއީއޯ) މަގާމަށް ސަހާ ވަހީދު މިއަދު އައްޔަންކޮށްފި އެވެ.
ބޭންކިން ދާއިރާއިން 18 އަހަރަށް ވުރެ ގިނަ ތަޖުރިބާ ހުންނެވި ސަހާ ގައުމީ ބޭންކާ އެންމެ ފުރަތަމަ ގުޅިވަޑައިގަތީ 2010 ގަ އެވެ. އޭނަ އެންމެ ފަހުން ހުންނެވީ ބީއެމްއެލްގެ ޕީޕަލް އެންޑް ޗޭންޖު ޑިރެކްޓަރުގެ މަގާމުގަ އެވެ.
އިނގިރޭސިވިލާތުގެ ލަންޑަން ސްކޫލް އޮފް އިކޮނޮމިކްސް އެންޑް ޕޮލިޓިކަލް ސައިންސްއިން ސަހާ ވަނީ އިކޮނޮމިކްސް އެންޑް އިކޮނޮމިކް ހިސްޓްރީގެ ދާއިރާއިން ޑިގްރީ ހާސިލުކުރައްވައިފަ އެވެ. އަދި, މާސްޓާސް ފުރިހަމަ ކުރެއްވީ ކޮމާޝަލް ލޯގެ ދާއިރާއިންނެވެ.
ސަހާ އަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބޯޑުގެ މެންބަރެކެވެ. އެ މަގާމަށް އޭނަ އައްޔަންކުރީ މިދިޔަ އަހަރުގެ ޑިސެމްބަރު 24 ގަ އެވެ.
ބީއެމްއެލްގެ ޑެޕިއުޓީ ސީއީއޯގެ މަގާމު ހުސްވީ 42 އަހަރު ބޭންކުގައި ހިދުމަތް ކުރުމަށް ފަހު އެ މަގާމުގައި ހުންނެވި އައިޝަތު ނޫރައްދީން އޮކްޓޯބަރު 31 ގައި އިސްތިއުފާ ދެއްވުމުންނެވެ.
މިހާރު އެ ބޭންކްގެ ސީއީއޯ އަކީ ކުރިން ޑެޕިއުޓީ ސީއީއޯގެ މަގާމު ފުރުއްވި މުހައްމަދު ޝަރީފެވެ.