ބަންޑާރަނައިބުގެ އޮފީހުގެ ބިލު ރައްޔިތުންގެ މަޖިލީހަށް ހުށަހަޅައިފި އެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި ބިލުގެ ފުރަތަމަ ކިޔުން އިއްވާފަ އެވެ.
މި ބިލު ހުށަހަޅާ ބޭނުމުގެ ގޮތުގައި ބުނެފައިވަނީ، ބަންޑާރަނައިބުގެ މަގާމަށް އައްޔަނުކުރެވޭ ފަރާތެއްގައި ހުންނަންޖެހޭ ޝަރުތުތަކާއި، ޒިންމާތަކާއި މަސްއޫލިޔަތުތަކާއި، އެ ޒިންމާތަކާއި މަސްއޫލިޔަތުތައް އަދާކުރުމުގައި ބަންޑާރަނައިބު ތަބާވާންޖެހޭ ހަމަތައް ކަނޑައެޅުމަށެވެ.
މީގެއިތުރުން ސިވިލް ސާވިސްގައި ނުހިމެނޭ ސަރުކާރުގެ ވަކި އޮފީހެއް ޤާއިމުކޮށް، އެ އޮފީހުގެ މަސައްކަތްތައް ރޭވިފައިވާ ގޮތާއި އެ އޮފީސް ހިންގުމާގުޅޭ އުސޫޅުތަކާއި މުވައްޒަފުންނާއިގުޅޭ އުސޫލުތައް ކަނޑައެޅުމުގެ ޤާނޫނީ އޮނިގަނޑު އެކުލަވާލުން ކަމަށްވެސް ބުނެފައިވެ އެވެ.
މި ބިލުގައި ބަންޑާރަނައިބަކަށް އައްޔަނުކުރާ މީހެއްގެ ހުންނަންވާނެ ޝަރުތުގެ ގޮތުގައި ބުނެފައިވަނީ، އެ މީހަކީ ޤާނޫނުގެ ދާއިރިން ފާހަގަކޮށްލެވޭފަދަ ތައުލީމާއި ތަޖުރިބާހުރި، ވަޒީރުންގެ މަޖިލީހަށް އައްޔަނުކުރުމުގެ ޝަރުތުހަމަވާ މީހަކު ކަމުގައި ވާންވާނެ ކަމަށެވެ.