މިދިޔަ އަހަރުގެ ތެރޭގައި އެންމެ މަޝްހޫރުވި އެއް ވާހަކަ އަކީ މާލޭގެ ބައެއް މަގުތަކުގައި އިންދާފައި ހުރި ފެންފޯއް ރުއްތަކެއް ކަނޑާލި ވާހަކައެވެ.
ފެންފޯއް ރުއް ކަނޑާލި ކަމުގެ ތުހުމަތު އެސްއޯ ފުލުހުންގެ ބޮލުގައި ގިނަ ބަޔަކު އެޅުވި ނަމަވެސް ފުލުހުން އިސްވެރިން ވިދާޅުވެފައިވަނީ އެކަން ކޮށްފައިވަނީ ފުލުހުން ނޫންކަމަށެވެ. ފެންފޯއް ރުއް ކަނޑަމުން ދަނިކޮށް މާފަންނު ޕޮލިސް ސްޓޭޝަނުގެ ފުލުހުންގެ ބެލުމުގެ ދަަށަށް ގެންދެވެނު މީހުންނަކީ ކޮންބައެއްކަން ފުލުހުންގެ ޕްރޮފެޝަނަލް ސްޓޭންޑާޑްސް ގެ ރިޕޯޓުތަކުގައި މިހާރުވެސް ލިޔެވިފައި ހުރި އިރު، ފެންފޯއް ރުއް ކަނޑާލި މައްސަލައިގެ ތަހުގީގު ރިޕޯޓް ބަދަލުކުރުމަށް ފުލުހުންގެ އިސްވެރިޔަކު އަންގާފައިވާކަން ވެސް އިތުބާރު ހުރިގޮތެއްގައި 'އައްޑޫލައިވް' އަށް ވަނީ އެނގިފައެވެ.
ފޯއް ރުށް ކަނޑާލި މައްސަލައާއި ގުޅިގެން އޭގެ 2 ދުވަސް ފަހުން ކުރީގެ ރައީސް ނަޝީދު ވަނީ ނޫސްވެރިންނާއި ބައްދަލުކޮށް ފެންފޯއް ރުއް ކަނޑާލުމުގައި އެސްއޯ ފުލުހުން ބައިވެރިވި ކަމަށް ވިދާޅުވެފައެވެ. އަދި އެ ހާދިސާ ހިނގި ރޭ މާލެ ތެރެ ޕެޓްރޯލް ކުރަމުން ދިޔަ ފުލުހުން ތައްޔާރުކުރި އިންސިޑެންޓް ރިޕޯޓެއް ލިބިފައިވާކަމަށް ވެސް ނަޝީދު އޭރު ވަނީ ވިދާޅުވެފައެވެ.
'އައްޑޫލައިވް' އަށް އެނގިފައިވާ ގޮތުގައި އެ ރިޕޯޓްގައި ފެންފޯއް ރުއް ކަނޑާލުމުގައި އެސްއޯ ފުލުހުން ބައިވެރިވިކަން އެނގޭ ކަމަށާއި އޭގެ ތެރެއިން މާސްކް އަޅައިގެން ހުރި އެއް ފުލުހަކު ކެޕިޓަލް ޕޮލިސްގެ ބެލުމުގެ ދަށަށް ގެންދެވުނު ކަމަށް ވެސް ލިޔެފައިވާ ކަމަށް ވެއެވެ. އަދި އެ އެސްއޯ ފުލުސް މީހާ ހައްޔަރު ކުރުމާއި ގުޅިގެން އޭނާ ކެޕިޓަލް ޕޮލިހުގެ ބެލުމުގެ ދަށުން އެސްއޯ ފުލުހުންގެ ބެލުމުގެ ދަށަށް ބަދަލު ކުރުމަށް ފުލުހުންގެ އިސްވެރިޔަކު އެންގެވުމުން އެކަމާއި ގުޅިގެން ފުލުހުންގެ މެދުގައި ދެބަސްވުން އުފެދުނު ކަމަށް ވެއެވެ.
ޖެހިގެން އައި ދުވަހު ހެނދުނު ފުލުހުންގެ މެސް ރޫމްގައި އެސްއޯ ފުލުހުންނާއި ކެޕިޓަލް ފުލުހުންނާ ދެމެދު ކުޑަވަރެއްގެ ހަމަނުޖެހުމެއް ހިނގާފައިވެއެވެ. މި ހަމަނުޖެހުން ހައްލުކޮށްފައި ވަނީ އޭރު ޑިފެންސް މިނިސްޓަރ ނާޒިމް އެތަނަށް ވަޑައިގެން ކަމަށް 'އައްޑޫލައިވް' އަށް ވަނީ އެނގިފައެވެ.
ފެންފޯއް ރުއް ކަނޑާލުމުގައި އެސްއޯ ފުލުހުން ބައިވެރިވި ކަމުގެ ޝަކުވާ ރައީސް ޔާމީން އަރިހުގައި ކުރައްވައި ފުލުހުން ބޭނުންކޮށްގެން ޖިނާއީ ކުށްތައް ހިންގުމަކީ އެއްގޮތަކަށް ވެސް ބަލައި ގަނެވޭނެ ކަމެއް ނޫން ކަމަށް ނާޒިމް ވިދާޅުވުމުން ރައީސް ޖަވާބު ދެއްވި ކަމަށް ވަނީ އެއީ އެކަން ކުރެވެން އޮތް ގޮތް ކަމަށާއި އެމަނިކުފާނުގެ ސިއްޙީ ހާލުކޮޅު ގޯސްވަނީ އެ ފެންފޯއް ރުއް ތަކާއި ހެދީ ކަމަށް ރައީސް ޔާމީން ވިދާޅުވިކަމަށް ވެއެވެ.
ރައީސްގެ ސިއްޙީ ޙާލުކޮޅު ގޯސްވެގެން، ފެންފޯއް ރުއްތައް ކަނޑާލި ނަމަވެސް މިއަދު އަނެއްކާވެސް މާލޭގައި 'މިނިވަން50' ގެ ހަރަކާތްތަކާއި ގުޅުވައިގެން އާޓިފިޝަލް ރުއްތަކެއް އިންދަން މިވަނީ ފަށައިފައެވެ. މިފަހަރު ސީދާ ރައީސް ޔާމީންގެ ސަރުކާރުންނެވެ.
ޣާޒީ ބިލްޑިންގެ ކުރިމަތީގައި އާޓިފިޝަލް ރުކެއް ބަހައްޓާފައިވާއިރު އެތަނަކީ ރައީސް އޮފީހާއި މާދުރު ނޫން ހިސާބަކަށް ވުމުން މިފަހަރު ވެސް ރައީސް ޔާމީންގެ ސިއްޙީ ހާލުކޮޅު ގޯސްވަނީ އާޓިފިޝަލް ރުކާއި ހެދީ ކަމުގައި ވިދާޅުނުވާނެ ބާއެވެ ؟
މިނިވަން 50 އޮފީސް ހިންގެވުމުގައި އިސްކޮށް ތިއްބެވި ބޭފުޅުންނަށް އުމަރު ނަސީރު ނުފޫޒުފޯރުވައިގެން އާޓިފިޝަލް ރުކެއް ޣާޒީ ބިލްޑިންގް ކުރިމަތީގައި ބެހެއްޓީ ރައީސް ޔާމީނަށް ޖެއްސުން ކުރެއްވުމަށް ކަމަށް ވުމަކީ ވެސް އެކަށީގެންވާކަމެކެވެ. އެމްޑީޕީ އިން ހުށަހެޅި ޝަރުތުތަކަށް ސަރުކާރުން އެއްބަސްވާން ފަށާފައިވަނީ ވެސް މި އާޓިފިޝަލް ރުއް ޣާޒީ ބިލްޑިންގް ކައިރީގައި ބެހެއްޓި ފަހުން ކަމަށް ވުމުން އަނެއްކާ މި ރުކަކީ ސަރުކާރަށް ތާއީދުކުރާ މީހުން ބުނާ 'ސިހުރު' ހަދާފައިވާ ރުކެއް ނޫންބާވައެވެ ؟