ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށް އެ އެޖެންސީން ކުއްޔަށްހިފާފައިވާ އިމާރާތެއްގެ ދެ ފްލޯގައި އަލަށް އެފެއްދި ޓީވީ ޗެނަލެއް ހިންގަމުންދާކަމަށް ތުހުމަތު ކުރެވޭ މައްސަލައިގައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަންނަން ނިންމައިފި އެވެ.
މި ކުއްލި މައްސަލަ ރައްޔިތުންގެ މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
މި ކުއްލި މައްސަލައާއި ގުޅިގެން މަޖިލީހުގެ މިއަދުގެ ޖަލްސާގައި ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، އެ ކުއްލި މައްސަލައިގައި ރައްޔިތުންގެ މަޖިލީހުގެ ގަވާއިދުގައި ކުއްލި މައްސަލައެއްގައި ހުންނަންވާނެ ކަމަށް ބަޔާންކޮށްފައިވާ ޝަރުތު ފުރިހަމަ ނުވާ ކަމަށާއި އެހެންކަމުން އެ މައްސަލަ ޖަލްސާއަށް ހުށަހެޅެން ނެތް ކަމަށެވެ.
މީކާއިލްގެ ކުއްލި މައްސަލައިގައި ބުނެފައިވަނީ، އެންސްޕާގެ އޮފީސް ހިންގުމަށްޓަކައި އިމާރާތެއް ކުއްޔަށް ނެގުމަށް، ޓެންޑާ ބޯޑް މެދުވެރިކޮށް ކޮށްފައިވާ އިއުލާނާ ގުޅިގެން ބޮޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ކިޔާ ކުންފުންޏަކަށް އެ ބިޑު އެވޯޑްކޯށް 4 ފްލޯގެ 5 އަހަރުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދީފައިވާ ކަމަށެވެ. އަދި އެ ކުންފުނިން 4 ފްލޯ ކުއްޔަށް ހިފުމަށްފަހު އޭގެތެރެއިން 2 ފްލޯ މޯލްޑިވްސް މީޑިއާ ހައުސްއިން 28 ނޮވެމްބަރު 2024 ގައި ހިންގަން ފަަށާފައިވާ އެމްއެމްޓީވީ ހިންގުމަށްޓަކައި ކުއްޔަކާނުލައި އެ ކުންފުންޏަށް ދީފައިވާ ކަމަށް ސޯޝަލް މީޑިއާގައި ދައުރުވާ ކަމަށް ކުއްލި މައްސަލައިގައި ބުނެފައިވެ އެވެ.
ކުއްލި މައްސަލައިގައި ބުނެފައިވަނީ، މޯލްޑިވްސް މީޑިއާ ހައުސްއަކީ މީޑިއާގެ މަސައްކަތްކުރުމަށް އެކުލަވާފައިވާ ކުންފުންޏެއްކަން ނަމުންވެސް ދޭހަވާއިރު، އެންސްޕާއަށް އޮފީހެއް ކުއްޔަށްނެގުމާ ގުޅޭ ބިޑު މީޑިއާ ކުންފުންޏަކަށް ހަވާލުކޮށްފައިވުމުންވެސް މި މުއާމަލާތަކީ ސައްހަ މަގުން ހިންގާފައިވާ މުއާމަލާތެއްކަމަށް ޝައްކުކުރެވޭ ކަމަށެވެ.