މި އަހަރުގެ ފިތުރު އީދު ނަމާދު ވެސް ބޮޑު ޖަމާއަތެއްގައި ކުރުމުގެ މަގުސަދުގައި އައްޑޫ ފުޓްބޯޅަ ސްޓޭޑިއަމްގައި އީދު ނަމާދު ކުރާ ގޮތަށް ހަމަޖެހިއްޖެއެވެ.
މިފަހަރުގެ ޢީދު ނަމާދު އައްޑޫ ސްޓޭޑިއަމްގައި ކުރުމުގެ މަސައްކަތް ކުރަމުންގެންދަނީ ސ.ހިތަދޫ ނޫރުލް އިސްލާމް ޖަމިއްޔާ އާއި ހިރާ ސްކޫލް އަދި އައްޑޫ ސިޓީ ކައުންސިލް ގުޅިގެންނެވެ.
މައުލޫމާތު ލިބިފައިވާ ގޮތުގައި އައްޑޫ ފުޓްބޯޅަ ސްޓޭޑިއަމްގައި އިމާމްވެ ޢީދު ނަމާދު ކުރައްވާނީ އައްޝައިޚް ޙަސަން ލަތީފް މޫސާއެވެ. އީދު ނަމާދުގެ ބޮޑު ޖަމާއަތުގައި ބައިވެރިވާން ބޭނުންވާ، ފޭދޫ، މަރަދޫ އަދި މަރަދޫ ފޭދޫގެ ރައްޔިތުން ޢީދު ދުވަހުގެ ހެނދުނު ކޮންމެ ރަށެއްގެ ވެސް ބޮޑުމަގުގައި ހުންނަ ބަސް ހުއްޓިތަކަށް ހެނދުނު 6:30 އަށް ވަޑައިގަތުމުން ހިލޭ ބަސް ދަތުރުގެ ޚިދުމަތް ލިބިގެންދާނެއެވެ.
ސްޓޭޑިއަމްގައި ޢީދު ނަމާދު ކުރުމަށް ވާންޖެހޭ ތައްޔާރީތައް ނޫރުލް އިސްލާމުގެ ފަރާތުން ކުރަމުން ގެންދާއިރު އެކަމާޢި ގުޅޭ އިންތިޒާމްތައް ހަމަޖެއްސުމަށާއި ވޮލަންޓިއަރުންގެ ގޮތުގައި ހަރަކާތްތެރިވާން ޝައުގުވެރިވާ ފަރާތްތަަކަށް އެޖަމިއްޔާގެ ފަރާތުން ވަނީ އެ ފުރުސަތު ހުޅުވާލާފައެވެ.
ޢީދު ނަމާދު ކުރުމަށް ސްޓޭޑިއަމް ތައްޔާރުކުރުމުގައި ޢަމަލީ ގޮތުން އެހީތެރިވާން ބޭނުންފުޅުވާ ފަރާތްތަކުން އަދި އެހެނިހެން ގޮތްގޮތުން އެހީތެރިކަން ފޯރުކޮށްދޭން ބޭނުންވާ ފަރާތްތަކުން 7725899 ނުވަތަ 9853200 އަށް ގުޅުއްވުމަށް ނޫރުލް އިސްލާމް ޖަމިއްޔާގެ ފަރާތުން އެދިލައްވައެވެ.