ރާއްޖެ ބަނގުރޫޓުވުމުގެ ވާހަކަ ދެއްކުން މިހާރު ހުއްޓިފައިވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު މޫސާ ޒަމީރާއި ސުވާލު ކުރުމަށް ލިބުނު ފުރުސަތުގައި ފޭދޫ ދެކުނު ދާއިރާގެ މެންބަރު އިބްރާހިމްދީދީ ވަނީ، ރައީސް ޑރ. މުހައްމަދު މުއިއްޒު ވެރިކަމާ ހަވާލުވިއިރު ކިހާވަރެއްގެ ދަރަންޏެއް ދައުލަތުގައި އޮތްތޯ ސުވާލު ކުރައްވާފަ އެވެ. އަދި ދަރަނި ދެއްކުމަށް ދައުލަތުގެ އާމްދަނީއިން ކިހާ ޕަސެންޓެއް ދައްކަންޖެހޭތޯ ސުވާލު ކޮށްފައިވެ އެވެ.
އެ ސުވާލަށް ޖަވާބު ދެއްވަމުން މިނިސްޓަރު މޫސާ ޒަމީރު ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގެންނެވިއިރު ދަރަނީގެ ގޮތުގައި 124 ބިލިއަން ރުފިޔާ އޮތް ކަމަށެވެ. އޭގެތެރެއިން ދެބައިކުޅަ އެއްބަޔަކީ ކުރީ ސަރުކާރުގެ ދަރަނިކަން ފާހަގަ ކުރެއްވި އެވެ. ޒަމީރު ވިދާޅުވީ ދައުލަތުގެ އާމްދަނީގެ 24 އިންސައްތަ ދަރަނި ދެއްކުމަށް ހޭދަކުރަންޖެހޭ ކަމަށެވެ.
މިނިސްޓަރު ޒަމީރު ވިދާޅުވީ ރައީސް ޑރ. މުހައްމަދު މުއިއްޒުގެ މަސައްކަތުން ބަޖެޓް ފޯމިއުލޭޓްކޮށް ދަރަނީގެ މައްސަލައަށް ހައްލު ހޯދުމަށް މަސައްކަތްތަކެއް ކުރެވިފައިވާ ކަމަށެވެ. އެގޮތުން ދައުލަތުގެ ރެވެނިއު ރަނގަޅުކޮށް ހަރަދުތައް ހަމަޖައްސާފައިވާކަމަށް ވިދާޅުވި އެވެ. އަދި އެކު ގައުމުތަކާއެކު މަސައްކަތްކޮށް އެ ހުރިހާ ކަމެއް މިހާރު ހުރީ ހަމަޖެހިފައި ކަމަށްވެސް ވިދާޅުވި އެވެ.
ރާއްޖެ ދަރަނިތަކުން ސަލާމަތް ކުރުމަށް ރައިސް ހުންނެވީ ވަރަށް ރަނގަޅަށް ޕްލޭން ކުރައްވައިގެން ކަމަށާއި މިކަމުގައި މިދިޔަ 1 އަހަރު ކާމިޔާބު މަސައްކަތްތަކެއް ކުރެވިފައިވާކަމަށް މިނިސްތަރު ޒަމީރު ވިދާޅުވި އެވެ.
ބޭރުގެ ރޭޓިން އެޖެންސީ ތަކުންވެސް ފަހުން ބުނެފައި ހުންނާނީ ރާއްޖޭގެ ހަރަދުތައް ކުޑަކުރުމަށާއި ކުރިން ދެއްކިގޮތަށް ރާއްޖެ ބަނގުރޫޓުވުމުގެ ވާހަކަ ދެއްކުން މިހާރު ހުއްޓިފައިވާ ކަމަށް މިނިސްޓަރު ޒަމީރު ވިދާޅުވި އެވެ. އަދި އެއީ ރައީސް މުއިއްޒުގެ ހަރުދަނާ ސިޔާސަތުތަކުގެ ނަތީޖާ ކަމަށްވެސް ވިދާޅުވި އެވެ.