އިނގިރޭސިވިލާތުގެ އަވަށެއްގެ ގެއެެއްގެ ކުރިމަތިިން މަގުމަތީގައި ބޮޑު ވަޅުގަނޑެއް ހެދި އެކަމާ ހެދި 30 ގެއަކުން މީހުން ހުސްކުރަން ޖެހިއްޖެ އެވެ.
މި ހާދިސާ ހިނގާފައި ވަނީ އާދީއްތަ ދުވަހު ހެނދުނު އިނގިރޭސިވިލާތު ޕާންޓްގެ މާތީ ޓައިޑްފިލްގަ އެވެ. މަގުމަތީގައި ހެދުނު ވަޅުގަނޑުގެ ފުންމިނުގައި ގާތްގަނޑަކަށް 50-60 ވަރަކަށް ފޫޓް ހުއްޓެވެ.
މިކަމާ ގުޅީގެން އެ އަވަށުގެ ކައުންސިލާއި ސައުތު ވޭލްސް ފުލުހުންނާއި އެތަނުގެ ފަޔަ އެންޑް ރެސްކިއު އިން ވަޅުގަނޑު ހެދުނު ނޭބަހުޑްގެ 30 ގެއަކުން މީހުން ހުސްކޮށްފައިވެ އެވެ. މި ހާދިސާގައި ގެއަކަށް އަދި އެއްވެސް މީހަކަށް ގެއްލުމެއް ނުވެ އެވެ.
އެ ސަރަހައްދު މި ވަގުތު އޮތީ ވަގުތީ ގޮތުން ބަންދުކޮށްފަ އެވެ. އަދި މިކަމާ ގުޅިގެން ނޭބަހުޑްގެ މީހުންނަށް ބޭނުންވާ އެހީތެރިކަން ފޯރުކޮށް ދޭނެ ކަމަށް ކައުންސިލުން ބުންޏެވެ.
ތާރު އަޅައިގެން ހަދާފައިވާ މަގުގައި ބޮޑު ވަޅުގަނޑެއް ހެދުނީ މަގުގެ އަޑިން ފެން ދެމޭ ގޮތަށް ހަދާފައިވާ ބައެއް ވެއްޓިގެން ކަމަށް މާތީ ޓައިޑްފިލްގެ ކައުންސިލަރު ޑޭވިޑް ހިއުސް ވިދާޅުވި އެވެ. އަދި އެގޮތަށް ދިމާވި ސަބަބަށް ކަމަށް ބެލެވެނީ ހާދސާ ހިނގި ދުވަހުގެ ކުރީ ރޭ ބޯކޮށް ވާރޭ ވެހުމުގެ ސަބަބުން ކަމަށް ގަބޫލު ކުރެވޭ ކަމަށް ވެސް ކައުންސިލަރު ވިދާޅުވި އެވެ.
މި ހާދިސާ ހިނގި ނޭބަހުޑްގެ މީހުން މިހާރު އަންނަނީ މިކަމާ ކަންބޮޑުވުން ފާޅުކުރަމުންނެވެ. އެގޮތުން ބައެއް މީހުން ބުނެފައި ވަނީ މި ހާދިސާގެ ވަރަށް ބޮޑު ބިރުވެރި ކަމަކާ ކުރިމަތިލާން ޖެހިފައިވާ ކަމަށެވެ. އެގޮތުން އެ މީހުން ގެއާ އެކީ އަޑިއަށް ގަނބައިގެންފާނެކަމުގެ ބިރު ވެސް މިހާރު އޮތް ކަމަށް ބައެއް މީހުން ބުންޏެވެ./