ދޫނިތަކާއި ރާއްޖެއަށް ހިޖުރަކުރާ ދޫނިތަކާ ގުޅުންހުރި ދިރާސާއެއް ކުރުމަށް އެއްބަސްވުމެއްގައި ސޮއިކޮށްފި އެވެ.
މި އެއްބަސްވުން ހެދީ އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އާއި ޔުނިވާސިޓީ އޮފް އޯކްލެންޑްއާ ދެމެދު އެވެ. އެއްބަސްވުމުގައި އީޕީއީގެ ފަރާތުން ސޮއިކުރެއްވީ ކްލައިމެޓް ޗޭންޖް، އެންވަޔަރަންމަންޓް މިނިސްޓަރު ތޯރިގް އިބްރާހީމެވެ.
އީޕީއޭ އިން ބުނީ މި އެއްބަސްވުމުގެ މަގުސަދަކީ ކަނޑުމަތީގައި ހަރަކާތްތެރިވާ ދޫނިތަކާއި ރާއްޖެއަށް ހިޖުރަކުރާ ދޫނިތަކާ ބެހޭ ދިރާސާތައް ކުރުމުގައި އެ އެޖެންސީގެ ގާބިލުކަން އިތުރުކުރުން ކަމަށެވެ. އަދި ދޫނިތައް އުޅޭ މާހައުލާއި ދިރިއުޅުމުގެ ވައްޓަފާޅިއާ ގުޅުން ހުރި މުހިންމު ކަންކަން އޭގެ އަލީގައި ދެނެގަންނާނެ އެވެ.
އަދި މީގެ ސަބަބުން އެފަދަ މާހައުލުތައް ހިމާޔަތް ކުރުމަށް އެހީތެރި ވެދޭނެ ކަމަށް ބެލެވޭ ކަމަށް ވެސް އީޕީއޭ އިން ބުންޏެވެ. އެތަނުން ބުނީ ދޫނިތައް ދިރިއުޅޭ މާހައުލު ރައްކާތެރި ކުރުމުގެ އިތުރުން "އިންވޭސިވް ސްޕީޝްތަކުން" ކުރިމަތިވާ ކަންކަމުން ރައްކާތެރިކަން ހޯދުމަށް ފިޔަވަޅުތައް އެޅުމަށް ވެސް މީގެ ދަށުން މަގުފަހިވާނެ ކަމަށެވެ.