މިހާރު ދުނިޔޭގެ އެންމެ ރީތި އެއާޕޯޓަކީ އަބޫ ދާބީގެ ޒައިދު އިންޓަނޭޝަނަލް އެއާޕޯޓް ކަމަށް ޕްރިކްސް ވާސައިލްސް އިން ބުނެފި އެވެ.
އާކިޓެކްޗާގެ ގޮތުން ހޯދާފައިވާ ކުރިއެރުންތަކާއި އާދަޔާހިލާފު މޮޅެތި ހިޔާލުތަކާއި ވިސްނުންތަކަށް ރިއާޔަތްކޮށްގެން ފަރުމާކުރާ ތަންތަަން ލިސްޓްކުރާ ޕްރިކްސް ވާސައިލްސް އެންމެ ރީތި އެއާޕޯޓްގެ ގޮތުގައި ޒައިދު އިންޓަނޭޝަނަލް އެއާޕޯޓް މި އަހަރު ލިސްޓްކުރީ 400 އެއާޕޯޓެއްގެ އިވެލުއޭޝަނަކަށް ފަހު އެވެ.
އެ އެއާޕޯޓަކީ މީގެ 42 އަހަރު ކުރިން ޖެނުއަރީ 2، 1982 ގައި ހުޅުވި އެއާޕޯޓެކެވެ. އޭގެ ފަހުން މިހާތަނަށް ބޮޑެތި ތަރައްގީތަކެއް ގެނެސްފައިވާ އިރު، ޒައިދު އިންޓަނޭޝަނަލް އެއާޕޯޓްގެ އެންމެ ހާއްސަ ސިފަތަކުގެ ތެރޭގައި އެ ތަނުގެ ހައިބަތާއި ކުރިއެރުމުގެ ވައްޓަފާޅި ދައްކުވައިދޭ ޒަމާނީ ޓާމިނަލްތައް ހިމެނެ އެވެ.
އެގޮތުން މިދިޔަ މަހުގެ 1 ގައި ހުޅުވި އާ ޓާމިނަލަކީ ޒައިދު އިންޓަނޭޝަނަލް އެއާޕޯޓްގެ މޫނުމައްޗަށް ވަރަށް ބޮޑު ބަދަލެއް ގެނެސްދީފައިވާ ވަރަށް ހިތްގައިމު ޓާމިނަލެކެވެ. މިއީ 742،000 އަކަފޫޓްގެ ޓާމިނަލެކެވެ. އެންމެ ޒަމާނީ ވަސީލަތްތަކާ އެކީ ގާއިމުކިޮށްފައިވާ ޓާމިނަލް އޭ އަކީ 11،000 މީހުންގެ ޖާގައިގެ އަދި އަހަރެއްގެ ތެރޭގައި 45 މިލިއަން ދަތުރުވެރިންނަށް ހިދުމަތް ދެވޭ ފެންވަރަށް ތަރައްގީކޮށްފައިވާ ޓާމިނަލެކެވެ.
ޕްރިކްސް ވާސައިލްސް އިން މި އަހަރު ދެން އެންމެ ރީތި އެއާޕޯޓްތަކުގެ ގޮތުގައި ލިސްޓްކޮށްފައި ވަނީ މެކްސިކޯގެ ފެލިކް އެންޖެލެސް އިންޓަނޭޝަނަލް އެއާޕޯޓާއި ސިންގަޕޫރްގެ ޗަންގީ އެއާޕޯޓްގެ (ޓާމިނަލް ދޭއް) އާއި ތައިލޭންޑްގެ ބެންކޮކްގެ ސުވަރްނަބޫމީ އެއާޕޯޓާއި އެމެރިކާގެ ބޮސްޓަންގެ ލޯގަން އިންޓަނޭޝަނަލް އެއާޕޯޓް (ޓާމިނަލް އީ) ގެ އިތުރުން އެ ގައުމުގެ ކެންސަސްގެ ކެންސަސް ސިޓީ އިންޓަނޭޝަނަލް އެއާޕޯޓެވެ.