ކަދުރުން ތައްޔާރުކޮށްފައިވާ ސޮފްޓް ޑްރިންކެއް "މިލަފް ކޯލާ" ގެ ނަމުގައި ސައޫދީ އަރަބިއްޔާ އިން ނެރެފި އެވެ.
މި ކޯލާ އަކީ ސައޫދީ އެރޭބިއަންގެ ޕަބްލިކް އިންވެސްޓްމަންޓް ފަންޑްގެ ސަބްސިޑަރީއެއް ކަމަށްވާ ތުރާތު އަލް މަދީނާގެ އުފެއްދުމެކެވެ.
އެ ކުންފުނިން ބުނީ ކަދުރުން ތައްޔާކުރި މި ކޯލާ އަކީ ތަފާތު ގޮތްގޮތަށް ކަދުރު ބޭނުން ކުރެވިދާނެ ދައްކައިވައި ދިނުމާއި ސައުދީގެ އުފެއްދުންތެރިކަން އިތުރު ކުރަން ވުޖޫދަށް ގެނައި ވަރަށް ވެސް ރަހަ މީރު، ސިއްހަތަށް ފައިދާ ހުރި ކޯލާއެއް ކަމަށެވެ.
"މިލަފް ކޯލާ" ލޯންޗްކުރީ ރިޔާދު ޑޭޓް ފެސްޓިވަލްގަ އެވެ. ކޯލާ ލޯންޗްކޮށް ދެއްވީ ސައުދީގެ އެގްރިކަލްޗަ މިނިސްޓަރު އަބްދުއްރަހުމާން އަލް ފަދްލީ އާއި ތުރާތު އަލް މަދީނާގެ ސީއީއޯ ބަންދަރު އަލް ގަހްތާނީ އެވެ.
ތުރާތު އަލް މަދީނާ އިން ބުނީ "މިލަފް ކޯލާ" އަކީ އަދި ފެށުމެއް ކަމަށާއި ސައުދީގެ އިގުތިސާދު ސިންދަފާތު ކުރަން ކަނޑައަޅާފައި އޮތް 2030 ތަސައްވުރާ ވާ އެއްގޮތަށް ކުރިއަށް އޮތް ތަނުގައި އަމިއްލަ އިތުރު އުފެއްދުންތަކެއް މާކެޓަށް ނެރޭނެ ކަމަށެވެ.
ގަހްތާނީ ވިދާޅުވީ އަލަށް ތައާރަފުކުރި ކޯލާ އަށް ވަރަށް ގިނަ ބައެއްގެ މަގުބޫލުކަން މިހާރު ލިބެމުން އަންނަ ކަމަށާއި މިއީ ވަރަށް ބޮޑު ހިތްވަރެއް ކަމަށެވެ.
استمتع بطعم ميلاف كولا!
The perfect refreshment made with pride🌴#ميلاف_كولا #MilafCola pic.twitter.com/zJWreaedLA— Milaf Cola (@drinkmilaf) December 1, 2024
"މި ކޯލާގެ ރަހަ ބެލި ވަރަށް ގިނަ ބަޔަކު ފާހަގަކުރާ އާންމުކޮށް މި ހުންނަ ސޮފްޓާ ޑްރިންކްތަކަށް މާ ބޮޑަށް ވެސް މި ކޯލާ މީރު ކަމަށް. އަދި މި ކޯލާ އިން އުފާވެރިކަން ގެނެސްދޭކަން ގިނަ ބަޔަކު އަންނަނީ ފާހަގަކުރަމުން." އޭނަ ވިދާޅުވި އެވެ.
"މިލަފް ކޯލާ" މިހާރު ސައޫދީގައި ވިއްކަމުން އަންނަ އިރު، ސަރަހައްދީ މާކެޓާއި ބައިނަލްއަގުވާމީ މާކެޓަށް މީ ކޯލާ ނެރެން މިހާރު އަންނަނީ ތައްޔާރުވަމުންނެވެ. ތުރާތު އަލް މަދީނާ ބުނީ މި ކޯލާ އަކީ ބައިނަލްއަގުވާމީ ފުޑް ސޭފްޓީ މިންގަނޑުތަކަށް ފެތޭ ގޮތަށް، އަދި ދެމެހެއްޓިނިވި ތިމާވެއްޓަށް ވެސް އިސްކަން ދީގެން ނެރެފައިވާ ބުއިމެކެވެ.