މިދިޔަ މަހުގެ ތެރޭގައި ސ. ހިތަދޫގައި ހިންގި މާރާމާރީއެއްގައި މަރައިލި ހުސައިން ޝިއާރުގެ މަރުގެ މައްސަލާގައި ހަތަރު މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިޔާ އޮފިޝަލް ވިދާޅުވި ގޮތުގައި ސ. ހިތަދޫ އަތީނާ، ޝިއާރު މަރާލި މައްސަލާގައި ހައްޔަރުކޮށްފައިވަނީ 24 އަހަރުގެ ފިރިހެނަކާއި 22 އަހަރުގެ ފިރިހެނެއްގެ އިތުރުން 20 އަހަރުގެ ދެ ފިރިހެނުން ކަމަށެވެ.
ފުލުހުންގެ ބެލުމުގެ ދަށަށް ގެންގޮސްފައިވާ 4 މީހުންގެ ތެރެއިން ދެމީހަކު ހައްޔަރުކޮށްފައިވަނީ މިދިޔަ ހޯމަ ދުވަހުއެވެ. އެމީހުންގެ ބަންދުގެ މުއްދަތަށް ހިތަދޫ މެޖިސްޓްރޭޓް ކޯޓުން ވަނީ 15 ދުވަހުގެ މުއްދަތެއް އިތުރުކޮށްދީފައި ވާއިރު ފުލުހުންގެ ބެލުމުގެ ދަށަށް އިއްޔެ ގެނައި 2 މީހުންގެ ބަންދުގެ މުއްދަތު އިތުރު ކުރުމަށް މިއަދުގެ ވަގުތެއްގައި ކޯޓަށް ހާޒިރު ކުރާނެ ކަމަށް ފުލުހުން ވަނީ ބުނެފައެވެ.
މައުލޫމާތު ލިބިފައިވާ ގޮތުގައި ފުލުހުން އެ މައްސަލާގައި ހައްޔަރުކުރި ހަތަރު މީހުންނަކީ ވެސް ތަފާތު ކުށްތަކުގެ ރެކޯޑް އޮންނަ މީހުންނެވެ.
ޝިއާރު މަރާލުމާއި ގުޅިގެން އެ މައްސަލަ ތަހުގީގްކުރުމަށް ފުލުހުންގެ ޚާއްސަ ޓީމެއް ދަނީ އައްޑޫގައި ހަރަކާތްތެރިވަމުންނެވެ.