މިނިވަން 50އަށް މާލެތެރެ ޒީނަތްތެރިކުރުމުގެ ގޮތުން ޣާޒީ ބިލްޑިންގް ކުރިމަތީގައި ބެހެއްޓި އާޓިފިޝަލް ރުއް އެތަނުން ނަގައިފިއެވެ.
މައުލޫމާތު ލިބިފައިވާ ގޮތުގައި ޣާޒީ ބިލްޑިންގް ކުރިމަތީގައި ހުރި އާޓިފިޝަލް ރުއް ނަގާފައިވަނީ އެ ރުއް އެހެންތަނެއްގައި ބެހެއްޓުމަށް ކަމަށް ވެއެވެ.
ޣާޒީ ބިލްޑިންގް ކުރިމަތީގައި އާޓިފިޝަލް ރުކެއް ބެހެއްޓުމާއި ގުޅިގެން ގިނަ ބަޔަކު ސޯޝަލް މީޑިޔާގައި ސަރުކާރަށް ފާޑު ކިޔާފައިވާކަން ފާހަގަކޮށްލެވެއެވެ. އެގޮތުން ބައެއް މީހުން ބުނެފައިވާ ގޮތުގައި، މާލޭގެ މަގުތަކުގައި ހުރި ފެން ފޯއް ރުއްތައް ކަނޑާލާފައި ވަނީ ސަރުކާރުން ބޭނުންވެގެން ކަމަށާއި މިހާރު އާޓިފިޝަލް ރުއް ބަހައްޓަނީ ކީއްކުރަންތޯ ސުވާލު އުފައްދައިފައެވެ.
މާލޭގެ މަގުތަކުގައި ހުރި ފެން ފޯއް ރުއްތައް ކަނޑާލާފައިވަނީ އެސްއޯ ފުލުހުންގެ ތެރެއިން ބަޔަކު ކަމަށް ތުހުމަތުކޮށް ގިނަ ބަޔަކު ވާހަކަދައްކާފައިވާއިރު ކުރީގެ ޑިފެންސް މިނިސްޓަރ ކާނަލް ނާޒިމްގެ ޝަރީޢަތުގައި އެމަނިކުފާނުގެ ފަރާތުން އެކަން ސާބިތުކޮށްދިނުމަށް ކޯޓަށް ހެކިން ހާޒިރުކޮށްދިނުމަށް އެދިފައިވެއެވެ. ނަމަވެސ ކޯޓުން އެ ފުރުސަތު ދީފައި ނުވާކަން ފާހަގަކޮށްލެވެއެވެ.