އިނގިރޭސި ޕްރިމިއާ ލީގުގައި ރޭ ކްރިސްޓަލް ޕެލެސްއާ ބައްދަލުކޮށް މެންޗެސްޓާ ސިޓީ 2-2 އިން އެއްވަރުވިއިރު، މެންޗެސްޓާ ޔުނައިޓެޑް 3-2 އިން ނޮޓިންހަމް ފޮރެސްޓް އަތުން ބަލިވެއްޖެ އެވެ.
ރޭގެ މެޗު އެއްވަރުވުމުން ސިޓީ މިހާރު އޮތީ 15 މެޗުން 27 ޕޮއިންޓު ހޯދައިގެން ލީގުގެ ހަތަރުވަނައިގަ އެވެ. ޔުނައިޓެޑް އޮތީ 15 މެޗުން ލިބުނު 19 ޕޮއިންޓާ އެކު ލީގުގެ 13 ވަނައިގަ އެވެ.
ޕެލެސްގެ ދަނޑުގައި ކުޅުނު މި މެޗުގެ ހަތަރުވަނަ މިނެޓްގައި ޑެނިއަލް މުނޯޒް ވަނީ ޕެލެސް އަށް ލީޑު ނަގައިދީފަ އެވެ. މިއީ ހިއުސް ތަނަވަސްކޮށްދިން ފުރުސަތަކުން ސިޓީގެ އޭރިއާ ތެރެއަށް ހުހަށް ވަދެ ފޮނުވާލި ހަމަލާއަކުން ކާމިޔާބުކުރި ގޯލެކެވެ. މެޗުގެ 30 ވަނަ މިނެޓްގައި މެތިއުސް ނުނޭސް ހުރަސްކޮށްދިން ބޯޅައަކުން އާލިން ހާލަންޑް ވަނީ ސިޓީ އަށް ނަތީޖާ އެއްވަރުކޮށްދީފަ އެވެ.
ނަމަވެސް ދެވަނަ ހާފްގެ ކުރީކޮޅު ޕެލެސް އިން ވަނީ އަލުން ލީޑު ނަގާފަ އެވެ. ސިޓީގެ އޭރިއާ ތެރެއަށް ހުރަސްކޮށްލި ބޯޅައެއް ބޮލުން ގޯލަށް ވައްދާލައިގެން ޕެލެސް އަށް ދެވަނަ ފަހަރަށް ލީޑު ނަގައިދިނީ މެކްސެންސް ލަކްރޮއިސް އެވެ. ސިޓީ އަށް ދެވަނަ ފަހަރަށް ނަތީޖާ އެއްވަރުކޮށްދިނީ މެޗުގެ 68 ވަނަ މިނެޓްގައި ރިކޯ ލުވިސް އެވެ.
މެޗުގެ 84 ވަނަ މިނެޓްގައި ލުވިސް އަށް ދެއްކި ދެވަނަ ރީނދޫ ކާޑާއެކު ރެފްރީ ވަނީ އޭނާ އަށް ރަތްކާޑު ދައްކާފަ އެވެ. ލުވިސް އަށް ދެވަނަ ރީނދޫ ކާޑެއް ދެއްކީ ޕެލެސްގެ ޑިފެންޑަރު ޓްރެވޯ ޗަލޯބާ އަށް ކުރި ފައުލަކާ ގުޅިގެންނެވެ.
އަމިއްލަ ދަނޑުގައި ކުޅުނު މެޗުން ރޭ ޔުނައިޓެޑް ބަލިވިއިރު، އެޓީމު ވަނީ މިދިޔަ ހަފްތާގައި އާސެނަލުން އަތުން 2-0 އިން ބަލިވެފަ އެވެ.
ރޭގެ މެޗުގެ ދެވަނަ މިނެޓްގައި ނިކޮލާ މިލެންކޮވިޗް ވަނީ ފޮރެސްޓަށް ލީޑު ނަގައިދީފަ އެވެ. މެޗުގެ 18 ވަނަ މިނެޓްގައި ރަސްމުސް ހޮއިލެންޑް ޔުނައިޓެޑަށް ނަތީޖާ އެއްވަރުކޮށްދިން އިރު، ފުރަތަމަ ހާފް ނިމުމުގެ ކުރިން ބްރޫނޯ ފެނާންޑޭސް ފޮނުވާލި ހިލޭޖެހުމެއް ވަނީ ގޯލުގެ ދަނޑި އަށް އަމާޒުވެފަ އެވެ.
ފޮރެސްޓުން ވަނީ ދެވަނަ ހާފްގެ ކުރީކޮޅު ދެ ގޯލު ކާމިޔާބުކޮށް ލީޑު ފުޅާކޮށްފަ އެވެ. އެގޮތުން މެޗުގެ 47 ވަނަ މިނެޓްގައި މޯގަން ގިބްސް ވައިޓް ފޮރެސްޓްގެ ދެވަނަ ގޯލު ކާމިޔާބުކުރީ ޔުނައިޓެޑްގެ އޭރިއާގެ ބޭރުގައި ހުރެ ފޮނުވާލި ހަމަލާއަކުންނެވެ. އަދި މެޗުގެ 54 ވަނަ މިނެޓްގައި ފޮރެސްޓްގެ ތިންވަނަ ގޯލު ކްރިސް ވުޑް ކާމިޔާބުކޮށްދިނީ ޔުނައިޓެޑްގެ އޭރިއާ ތެރެއަށް ހުރަސްކޮށްލި ބޯޅައެއް ބޮލުން ފޮނުވާލައިގެންނެވެ.
ޔުނައިޓެޑްގެ ދެވަނަ ގޯލު މެޗުގެ 61 ވަނަ މިނެޓްގައި ކާމިޔާބުކޮށްދިނީ ބްރޫނޯ ފެނާންޑޭސް އެވެ. މި ގޯލަށްފަހު ނަތީޖާ އެއްވަރުކުރަން ޔުނައިޓެޑުން މަސައްކަތް ކުރި ނަމަވެސް އެކަން ކާމިޔާބު ކުރެވިފައެއް ނުވެ އެވެ.
ލީގުގައި ޔުނައިޓެޑް ދެން ބައްދަލުކުރާނީ މެންޗެސްޓާ ސިޓީއާ އެވެ.