ސީރިއާގެ ރައީސް ބައްޝާރުލް އަސަދު ގައުމު ދޫކޮށް ވަޑައިގަންނަވަން ޖެހިވަޑައިގަތުމުން އެކަމާ ހިތާމަކުރައްވާ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
ސީރިއާގެ ސަރުކާރާއި ދެކޮޅަށް މަސައްކަތް ކުރާ ހަނގުރާމަވެރި ޖަމާއަތްތަކުން އެގައުމުގެ ވެރިރަށް، ދިމިޝްގު ހިފުމާއެކު އަސަދު ވަނީ ގައުމު ދޫކޮށް ފިއްލަވާފަ އެވެ. އަސަދު ފިއްލަވައިގެން ވަޑައިގެންނެވި ތަނެއް މިހާތަނަށް އެނގިފައެއް ނުވެ އެވެ.
އަސަދުގެ ޒަމާންވީ ދިގު ވެރިކަން ނިމުމަކަށް އައިސްފައިވާއިރު، އެކްސްގައި ކުރެއްވި ޕޯސްޓެއްގައި މައުމޫން ވިދާޅުވީ ސީރިއާގެ ރައީސް އަސަދު ޤައުމު ދޫކުރައްވައި ވަޑައިގަތުމަށް ޖެހިވަޑައިގަތްކަމަށްޓަކައި ހިތާމަކުރައްވާ ކަަމަށެވެ.
"އަޅުގަނޑު އެދެނީ އެކުވެރި ސީރިއާގެ އުޚުއްވަތްތެރި ރައްޔިތުންނަށް ސުލްޙަ މަސަލަސްކަމާއި އުފާ ފާގަތިކަން،" މައުމޫން ވިދާޅުވި އެވެ.
ރަޙްމަތްތެރި ސީރިޔާގެރައީސް ބައްޝާރުލްއަސަދު ޤައުމު ދޫކުރައްވައި ވަޑައިގަތުމަށްޖެހިވަޑައިގަތްކަމަށްޓަކައި ހިތާމަކުރަން. އަޅުގަނޑު އެދެނީ އެކުވެރި ސީރިޔާގެއުޚުއްވަތްތެރި ރައްޔިތުންނަށް ސުލްޙަމަސަލަސްކަމާއި އުފާފާގަތިކަން.
— Maumoon Abdul Gayoom (@maumoonagayoom) December 8, 2024
ސީރިއާގެ އިދިކޮޅު ލީޑަރު ހާދީ އަލް ބަހްރާ އަލް-އަރަބިޔާ އަށް ވިދާޅުވީ އަސަދުގެ ވެރިކަން ވެއްޓުމަކީ އަނދިރިކަމުގެ ތެރެއިން އަލިކަމުގެ ތެރެއަށް ސީރިއާ ރުޖޫއަވުން ކަމަށެވެ.
"އެ ކަޅު ސޮފްހާ މާޒީވެގެން ދިޔައީ. މިއީ ސީރިއާގެ ރައްޔިތުންނަށް ލިބުނު ނަސްރެއް." އޭނަ ވިދާޅުވި އެވެ.
ދެހާސް އެގާރައިގެ ފަހުން ސީރިއާ އޮތީ ދާހީލީ ހަނގުރާމައެއްގެ ތެރޭގަ އެވެ. މީގެ ސަބަބުން ގައުމު ވަރަށް ބޮޑަށް ވީރާނެ، ސުންނާފަތިވެ، ރައްޔިތުން ތިބީ އިންސާނީ ބޮޑު ކާރިސާއެއްގެ ތެރޭގަ އެވެ.
ސީރިއާ އަކީ މެދުއިރުމަތީގެ ގައުމުތަކުގެ ތެރެއިން ހާލަތު އެންމެ ގޯސް އެއް ގައުމެވެ.