ރާއްޖެ އަށް މިއަހަރު ޒިޔާރަތް ކުރި ފަތުރުވެރިންގެ އަދަދު މިދިޔަ އަހަރަށް ވުރެ އިތުރުވެއްޖެ އެވެ.
މޯލްޑިވްސް އިމިގްރޭޝަނުން އެކްސްގައި ކުރި ޕޯސްޓެއްގައި ބުނީ މިއަދާ ހަމައަށް ރާއްޖެއަށް 1.88 މިލިއަން ފަތުރުވެރިން ރާއްޖެ އައިސްފައިވާ ކަމަށެވެ. އެއީ މިދިޔަ އަހަރު ރާއްޖެ އައި ފަތުރުވެރިންނަށް ވުރެ ވެސް އިތުރު އަދަދެއް ކަމަށް އިމިގްރޭޝަނުން ބުންޏެވެ.
މިދިޔަ އަހަރު ރާއްޖެ އައީ 1.87 މިލިއަން ފަތުރުވެރިންނެވެ.
މިއަހަރު ރާއްޖެ އަށް އެންމެ ގިނައިން ފަތުރުވެރިން އައިސްފައިވަނީ ޗައިނާ އާއި ރަޝިއާ އިންނެވެ. ޗައިނާ އާއި ރަޝިއާ އަކީ ޓޫރިސްޓުންގެ އަދަދު މި އަހަރު 200،000 އިން މައްޗަށް އެރި ހަމައެކަނި ދެ ގައުމެވެ.
ރާއްޖެ އަށް އެންމެ ގިނަ ޓޫރިސްޓުން އަންނަ ތިން ވަނަ ގައުމަކީ އިނގިރޭސިވިލާތެވެ. ގަދަ 10 ގައި ދެން ހިމެނޭ ގައުމުތަކަކީ ޖަރުމަން، އިޓަލީ، އިންޑިއާ، އެމެރެކާ، ފްރާންސް، ސްޕެއިން އަދި ސްވިޓްޒަލޭންޑް އެވެ.
މި އަހަރުގެ އަމާޒަކީ ދެ މިލިއަން ޓޫރިސްޓުން ކަމަށްވާ އިރު، ޓޫރިޒަމް މިނިސްޓްރީން ބުނެފައި ވަނީ މި މަހުގެ ފަހުކޮޅު އެ އަދަދު ހަމަވާނެ ކަމަށެވެ.