އަންނަ ރޯދަ މަހު ވެސް ފެނާއި ކަރަންޓު ބިލުން ޑިސްކައުންޓް ދިނުމަށް ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މިދިޔަ ރޯދަ މަހު ވެސް ފެނާއި ކަރަންޓު ބިލުން ޑިސްކައުންޓް ސަރުކާރުން ދީފައިވެ އެވެ.
އއ. މަތިވެރީގައި ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މިދިޔަ ރޯދަ މަހު ކަރަންޓާއި ފެނުން ޑިސްކައުންޓް ދިން ގޮތަށް މި ރޯދަ މަހު ވެސް ޑިސްކައުންޓް ދޭނެ ކަމަށެވެ.
"މި އަންނަ އަހަރުގެ ރަމަޟާން މަސް އަންނަން މާ ގިނަ ދުވަހެއް ނެތް. ވަރަށް މަދު މަސްތަކެއް މިއޮތީ. ހަމަ މިދިޔަ ފަހަރު ދިންހެން ރާއްޖޭގެ ތާރީހުގައި އަލަށް ރޯދަމަހުގެ ޑިސްކައުންޓް އަޅުގަނޑުމެން ބިލުތަކުން ދިނިން. ކަރަންޓާއި ފެނުން. ހަމައެގޮތަށް އަނެއްކާވެސް އެ ޑިސްކައުންޓު ދޭނަން އިރާދަކުރެއްވިއްޔާ. މި އަންނަ އަހަރުވެސް ރޯދަމަހު،" ރައީސް ވިދާޅުވި އެވެ.
ރައީސް ވިދާޅުވީ ސަރުކާރުން ވީހާވެސް ގިނަ އެހީތެރިކަން ދޭނެ ކަމަށާއި ކަންކަމުގައި އަތަށް ލުއިކޮށްދީގެން، ހަރަދުތައް ލުއިކޮށްދީ، އާމްދަނީ އިތުރުކޮށްދެވޭނެ ގޮތްގޮތް ހެދިގެންދާނެ ކަމަށެވެ.
ރޯދަ މަހު ފެނާއި ކަރަންޓު ބިލުން ޑިސްކައުންޓް ދިނުމަށް ނިންމާފައިވާއިރު، ރޯދަ މަހު ކޮންމެ ގޭބީސީއަކަށް މަސްދަޅު ކޭހެއް ހިލޭ ދިނުމަށް ވެސް ސަރުކާރުން ވަނީ ނިންމާފަ އެވެ.