އެންމެ ޒަމާނީ "ސްޓައިލް" ގައި ފެންވަރާލެވޭ މެޝިނެއް ޖަޕާނުން އުފައްދައިފި އެވެ.
މީހުން "ދޮންނަ" މި މެޝިނަކީ އެ ގައުމުގެ ކުންފުންޏެއް ކަމަށްވާ ސައިންސް ކޯގެ އުފެއްދުމެކެވެ. "މިރާއީ ނިންޖެން ސެންޓަކޫކީ" ކިޔާ މި މެޝިން މި ދައްކައިލަން ހަމަޖެހިފައި ވަނީ އަންނަ އަހަރުގެ އެޕްރީލް މަހުގެ 13 ވަނަ ދުވަހު ފަށަން ހަމަޖެހިފައިވާ "އޮސާކާ ކަންސާއީ އެކްސްޕޯ" ގަ އެވެ.
އެ އެކްޕޯސްގައި މެޝިންގައި ފެންވަރާލުމުގެ ތަޖުރިބާ 1،000 މީހަކަށް ދޭން ވެސް ހަމަޖެހިފައިވެ އެވެ.
މީހުން "ދޮންނަ" މެޝިން އުފެއްދި ކުންފުނިން ބުނެފައިވާ ގޮތުގައި މިއީ ޒަމާނީ ޓެކްނިލޮޖީ ބޭނުންކޮށްގެން ތައްޔާރުކޮށްފައިވާ މެޝިނެކެވެ. އެގޮތުން މެޝިންގެ ތެރޭގައި މީހާ "ދޮވެލައި ހިއްކައިލަން" ނަގާނީ 15 ވަރަކަށް މިނިޓެވެ. މި މެޝިން ތައްޔާރުކޮށްފައި ވަނީ އާޓިފިޝަލް އިންޓެލިޖެންސް (އޭއައި) ވެސް ބޭނުންކޮށްގެން ކަމަށްވާތީ މިއީ މިހާގެ ބައޮލޮޖިކަލް މައުލޫމާތު އެއްކޮށް، އެއަށް ބިނާކޮށް މީހާގެ ހަށިގަނޑުގެ ފިނިހޫނުމިނާ އެކަށީގެންވާ ގޮތަށް މެޝިންގެ ފެނުގެ ފިނިހޫނުމިން ހެޔޮވަރުކޮށް ދޭނެ އެއްޗެކެވެ.
މީގެ ތެރެއަށް މީހާ އެރުމުން ފެނުގެ ތެރޭގައި އުފެދޭ ހިތްގައިމު މައިކްރޯ ސައިބޯނި ބޮކިތަކެއް ފެތުރި، އެ އެއްޗިއްސަށް އަންނަ ޕްރެޝަރާ އެކީ މުޅި ހަށިގަނޑުގެ ބޭރުގައި ހުންނަ ހުރިހާ ހަޑިއެއް ފިލުވައި މީހާ، ވަރަށް ރީތިކޮށް "ދޮވެލާނެ" އެވެ. ޕޮޑެއްގެ ބައްޓަމަށް އިންނަ މި މެޝިންގެ ހާއްސަ އެއް ސިފަކީ ހަށިގަނޑުގެ ދޮވެލުމުގެ އިތުރުން މީގެ އޭއައިއޭގެ އެހީގައި މީހާގެ "ސިކުނޑި ވެސް ދޮވެލައި" ދިނުމެވެ.
އިންސާނުން "ދޮންނަ" މި މެޝިނުގެ ވާހަކަ މީޑިއާތަކުގައި ދެކެވި، ވަރަށް ގިނަ ބައެއްގެ ސަމާލުކަން މިހާރު ވަނީ ހުއްޓިފަ އެވެ. އެކަމަކު މި މެޝިން އާންމުކޮށް ބާޒާރަށް ނެރޭނެ އިރާކާއި އެއް ވިއްކާގެ އަގާ ބެހޭ އެއްވެސް މައުލޫމާތެއް ސައިންސް ކޯ އިން އަދި ނުދެ އެވެ.