އިންޑިއާގެ އެކްޓަރު ސޯނޫ ސޫދު ޑައިރެކްޓްކޮށް، ކުޅުނު ފުރަތަމަ ފިލްމު "ފަތޭ" ގެ ރަސްމީ ޓީޒާ ޓްރެއިލާ މިއަދު ދައްކާލައިފި އެވެ.
އޭނަ ޕްރޮޑިއުސަރެއްގެ ގޮތުގައި ވެސް ހިއްސާވާ މި އެކްޝަން ތުރިލާ ސިނަމާތަކަށް ގެންނަން ހަމަޖެހިފައި ވަނީ އަންނަ މަހުގެ 10 ގަ އެވެ. އިންޑިއާގެ އިތުރުން އެމެރިކާގައި މަންޒަރުތައް ނަގާފައިވާ "ފަތޭ" ގެ ބަތަލާ އަކީ ޖެކްލީން ފެނާމްޑޭޒެވެ.
ފިލްމުގެ އިތުރު ކާސްޓުންގެ ތެރޭގައި ނަސީރުއްދީން ޝާހާއި ވިޖޭ ރާޒް ހިމެނެ އެވެ.
"ފަތޭ" އަކީ ގިނަ ދުވަސްތަކެއް ފަހުން ސޯނޫ ފިލްމެއްގެ ލީޑުން ފެންނާނެ ފުރަތަމަ ފަހަރެވެ. ކެރިއަރުގެ ކުރީކޮޅު ލީޑް ރޯލު ފެނުނު ނަމަވެސް މި ފަހުން އޭނަ މުޅިން ވެސް ކުޅެފައި ވަނީ ސަޕޯޓިން ރޯލުތަކެވެ. ބޮލީވުޑްގެ އިތުރުން ސޯނޫ އަކީ އިންޑިއާގެ ދެކުނުގެ ފިލްމުތައް ވެސް ކުޅޭ އެކްޓަރެކެވެ.
އޭނަ އެންމެ ފަހުން ފެނިފައި ވަނީ މިދިޔަ އަހަރު ރިލީޒްކުރި ތަމަޅަ އެކްޝަން ތުރިލާ "ތަމިލަސަރަން" އިންނެވެ. ސޯނޫގެ އެންމެ ފަހުގެ ހިންދީ ފިލްމަކީ އަކްޝޭ ކުމާރުގެ 2022 ގެ ތާރީހީ ހަނގުރާމަ ފިލްމު "ސަމްރާޓް ޕްރިތުވީރާޖް" އެވެެ.